EKONOMIA, HEADLINE

Servisu guarda florestál falta transporte atu halo patrullamentu

Servisu guarda florestál falta transporte atu halo patrullamentu

Guarda florestál 223 asina kontratu hodi reforsa kontrolu iha ai-laran. Foto/Tomé Amado

DILI, 06 Juñu 2024 (TATOLI) – Xefe Departamentu Guarda Florestál, Ministériu Agrikultura, Pekuária, Peska no Floresta, Apolinário Freitas, informa katak servisu guarda florestál iha munisípiu sira falta transporte atu halo partullamentu iha área protejida sira.

Apolinário Freitas haktuir katak foin munisípiu hitu maka hetan transporte hamutuk ualu, maibé veíkulu sira ne’e ninia kondisaun entre tinan 7 no 10 ona. Dili iha karreta rua, Bobonaro Covalima, Baucau, Manatuto, Lautém no Viqueque hetan karreta idaidak.

“Maibé, ba munisípiu sira seluk, to’o agora seidauk hetan apoiu transporte ida”, xefe departamentu ne’e dehan iha Colmera, ohin.

Tanba ne’e, diretór ne’e sujere atu iha tinan oin ministériu bele aprova planu sira atu sosa karreta foun hodi troka veíkulu ida ne’ebé ladi’ak, nune’e bele redús kustu ba manutensaun. “Ba 2025, diresaun hato’o ona proposta ba ministériu atu sosa tan karreta rua ho motorizada hamutuk 40”, informa.

Nia dehan transporte sira ne’e importante tebes atu apoia servisu guarda florestál nian, liuliu bainhira akontese situasaun emerjénsia ruma iha área protejida sira hodi bele halo intervensaun lalais iha terrenu.

Departamentu Guarda Florestál rejista pesoál hamutuk 315, husi númeru ne’e na’in-11 mak asume kargu diretór no xefe departamentu sira no na’in-304 hanesan funsináriu ne’ebé destaka iha Aileu 17, Ainaro 15, Ataúro lima, Bobonaro 28, Baucau 18, Covalima 25, Dili 53, Ermera 22, Lautém 22, Liquiçá 17, Manatuto 17, Manufahi 19, Covalima 21, Oé-Cusse 12 no Viqueque hitu.

Dirijinte ne’e konsidera katak númeru ne’ebé iha ne’e seidauk sufisiente atu kobre área floresta iha territóriu, tanba diresaun hakarak atu númeru pesoál guarda floresta ne’e tenke atinje 1.700-resin. “Ne’e duni, kada tinan, hahú husi 2025 bele rekrtuta tan guarda na’in-286 hodi bele atinje númeru ne’ebé diresaun termina ona”, adianta.

Notísia relevante: Ministru Agrikultura orienta guarda florestál proteje plantasaun Ai-Kameli iha territóriu   

Jornalista: Tome Amado

Editora: Maria Auxiliadora

iklan
iklan

Leave a Reply

iklan
error: Content is protected !!