iklan

COVALIMA, HEADLINE

SMOP observa estrada Suai bá postu tolu ne’ebé kotu totál

SMOP observa estrada Suai bá postu tolu ne’ebé kotu totál

Diretór Servisu Munisipál Obra Públika Covalima, Sidónio Gusmão, observa estrada kotu iha Tilomar. Foto/Celestina Teles.

COVALIMA, 06 Juñu 2024 (TATOLI) –  Servisu Munisipál Obra Públika (SMOP) observa estrada ligasaun husi Suai bá postu Tilomar, Fatumea no Fohorem, ne’ebé kotu totál hodi difikulta movimentu ema no transporte públiku sira.

Estrada kotu ne’e tanba kauza husi udan-boot ne’ebé akontese dezde loron 30 Maiu hodi danifika infraestrutura bázika sira.

“Ami identifika ona estrada ne’ebé hetan estragu iha postu Zumalai no Tilomar. Ohin, ami mai atu observa estrada ne’ebé kotu, iha suku Lalaua, postu Tilomar, maske halo ona normalizasaun, maibé nafatin laiha solusaun. Tanba ne’e, presiza atu buka solusaun hodi loke estrada alternativa”, Diretór SMOP, Sidónio Gusmão hateten, ohin.

Liuhusi observasaun ne’e mak sei deside hodi loke estrada alternativa no halo levantamentu ba pontu estrada ne’ebé kotu, nune’e bele submete proposta ba Ministériu Obra Públika (MOP) no iha posibilidade, iha 2025, bele iha ona nia rezultadu.

Administradór Postu Administrativu Tilomar, Venâncio Sarmento, relata udan ne’ebé akontese aleinde halo estrada ligasaun husi Suai bá postu tolu kotu, hamosu mós inundasaun.

“Ita hotu haree kondisaun estrada liga husi postu tolu bá Suai no Suai mai postu tolu kotu totál maske Servisu Munisipál Obra Públika halo ona normalizasaun, maibé nafatin laiha solusaun” nia haktuir.

Ho nune’e, hamutuk ho SMOP observa hodi buka alternativa loke estrada foun hodi fasilita movimentu ema no transporte públiku bá-mai.

Udan-boot ne’ebé akontese ne’e lori mós inundasaun ba ema 256 husi postu postu Tilomar, Suai no Zumalai.

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!