EKONOMIA, HEADLINE

Governu faan foos ho marka MKAE ho folin $12.50

Governu faan foos ho marka MKAE ho folin $12.50

Diretora Nasionál Regulasaun Komersiál (DNRK), Manuela da Silva Tilman

DILI, 07 juñu 2024 (TATOLI) – Ministériu Komérsiu Indústria (MCI) no Sentru Lojístika Nasionál (CLN) hala’o ona intervesaun merkadu ho foos marka MKAE ho folin $12.50.

Polítika intervasaun merkadu ne’e ho objetivu atu halo normalizasaun folin foos iha merkadu, nune’e komunidade iha kbiit ka iha kapasidade hodi sosa foos, tanba daudaun folin foos sa’e to’o ona $19 to’o $21 iha territóriu laran.

“Foos ne’ebé ita halo intervensaun ba merkadu munisípiu Dili, postu administrativu Ataúro, Rejiaun Administrativa Espesiál Oé-Cusse Ambeno (RAEOA), no Ermera hamutuk tonelada 50, ekivalente saka 2.000, kada saka 25kg ho folin $12,50”, Diretora Nasionál Regulasaun Komersiál iha Ministériu Komérsiu no Industria (MCI), Manuela da Silva Tilman, informa iha nia kna’ar fatin Bebora, tersa ne’e.

Governu halo intervensaun tanba haree povu kiik balun kapasidade laiha atu kompra foos ho folin $18 to’o $19, entaun Governu presiza halo intervensaun ba merkadu.

Nia esplika, Governu halo intervensaun ba merkadu ho maneira la hanesan uluk, tanba uluk ne’e liuhusi empreza mak bá halo intervensaun, maibé agora Governu rasik tun diretamente.

“Intervensaun merkadu agora ne’e sistema muda ona, uluk ita fó liuhusi empreza sira mak halo intervensaun, maibé agora lae, funsionáriu sira husi parte CLN mak tun diretamente halo intervensaun iha suku to’o aldeia sira”, nia esplika.

MCI no CLN halo ona intervensaun ba merkadu iha Munisípiu Ermera no tuir planu Governu sei kontinua ba munisípiu sira seluk.

“Atu hateten katak munisípu hotu Governu sei halo hotu intervensaun merkadu nune’e povu sira bele asesu hotu, tanba foos marka MKAE iha armajen CLN sufisiente atu responde ba preokupasaun komunidade nian ba folin foos karun ne’ebé mak iha”, nia konklui.

Jornalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!