iklan

NASIONÁL, INTERNASIONÁL, JUSTISA, DILI, HEADLINE, POLÍTIKA

Portugál iha kompromisu apoia TL ba reforma justisa

Portugál iha kompromisu apoia TL ba reforma justisa

Ministra Justisa Portugal, Rita Alarcão Júdice bainhira hosoru PM Xanana Gusmão hodi halao enkontru iha Palásiu Governu, Dili, sesta (07 juñu 2024). Imajen Tatoli/Antonio Daciparu

DILI, 07 Juñu 2024 (TATOLI) – Primeiru-Ministru (PM), Kay Rala Xanana Gusmão simu vizita ofisiál hosi Ministra Justisa (MJ) Portugal, Rita Alarcão Júdise, hodi hato’o kompromisu hakarak apoia Timor-Leste ba reforma justisa

“Sira iha Portugal mós foin mak forma Governu foun. Ne’ebé, Ministra Justisa mai atu hatudu katak Timor iha Portugal nia fuan. Saida de’it mak ita presiza, bainhira hakarak kooperasaun sei mai nafatin hosi Portugal. Ami ko’alia liu kona-bá reforma justisa,” Primeiru-Ministru hateten hafoin reuniaun, iha Gabinete Fronteira Marrítima no Terrestre, Palásiu Governu, sesta ne’e.

Xefe Governu katak tan, tuir loloos iha vizita Ministra Justisa, Rita Alarcão Júdise nian ne’e, atu selebra kedan asinatura akordu iha área reforma setór justisa, maibé la konsege realiza tanba iha kestaun balun no Ministru Justisa Timor-Leste, Sérgio Hornai sei ba asina akordu ne’e iha Portugal.

Iha esplikasaun Primeiru-Ministru katak, akordu ne’ebé parte rua sei asina tanba Timor-Leste iha ona planu reforma justisa ba dimensaun rua maka hanesan primeiru médiu prazu no segundu longu prazu.

“Ho ida ne’e ita sei haruka joven sira bá estuda direitu iha Portugal. Kurtu prazu nian hodi ajuda juis, prokuradór, defensór no advogadu sira. Ne’e metodolojia ida atu ita bele halo avaliasaun di’ak liu no ita bele ajuda sira hodi komprende. Juis no prokuradór sira hosi Portugal la’ós mai atu servisu, tanba dala ruma sira hakerek no ita-nia juis sira la komprende hodi asina de’it. Ne’ebé sira mai hosi Portugal atu fó apoiu de’it. Ita presiza hadi’a tiha justisa ne’ebé ita temi beibeik justisa la di’ak,” Xefe Governu tenik.

Iha fatin hanesan, Ministra Justisa Portugal, Rita Alarcão Júdise sente ondradu tebes ho vizita mai Timor-Leste no hasoru-malu ho Primeiru-Ministru, Kay Rala Xanana Gusmão.

“Ha’u hakarak atu hato’o agradesimentu ba Primeiru-Ministru Kay Rala Xanana Gusmão. Ha’u sente ondradu boot tanba bele mai to’o iha Timor. Nune mós ha’u mai iha ne’e iha momentu importante mós ho selebrasaun loron moris ba dala-500,  Luis Camões nu’udár poeta Portugueza ne’ebé ho nia obra sira barak liu hanesan investimentu boot iha Língua Portugueza. Alende ne’e hanesan forma ida hosi Lingua Portugeza halo ita sai maun alin liután,” Ministra ne’e hateten.

Enkontru ne’e Primeiru-Ministru akompaña hosi Ministru Justisa, Sérgio de Jesus Fernandes da Costa Hornai, Ministru Negósiu Estranjeiru no Kooperasaun (MNEK), Bendito dos Santos Freitas, no Koordenadora Grupu Traballu Reforma Justisa, Lúcia Lobato.

Antes fahe-malu, Primeiru-Ministru tara tais no entrega prenda Kafe Timor bá Ministra ho delegasaun.

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!