POLÍTIKA

PPN: PDHJ entrega relatóriu anuál ba PN

PPN: PDHJ entrega relatóriu anuál ba PN

Presidente Parlamentu Nasionál, Maria Fernanda Lay. Imajen Tatoli/Egas Cristóvão

DILI, 07 juñu 2024 (TATOLI)—Provedór Direitu Umanu no Justisa (PDHJ, siglá portugés), Virgílio Guterres, sesta ne’e, hala’o audiénsia no entrega relatóriu anuál ba Prezidente Parlamentu Nasionál (PPN), Maria Fernanda Lay.

“Ohin, sira PDHJ mai entrega relatóriu (anuál) servisu 2023 ne’ebé tuir lei iha dever atu fó ba parlamentu nasionál,” Prezidente Parlamentu Nasionál, Maria Fernanda Lay, hateten ba jornalista sira hafoin ramata audiénsia iha PN.

Iha audiénsia ne’e, nia dehan, sira ko’alia mós asuntu sira seluk nune’e PN ho PDHJ bele presta serbisu di’ak liután tuir nia kna’ar ne’ebé iha.

Provedór PDHJ, Virgílio Guterres, hateten audiénsia ho PPN ho objetivu aprezenta relatóriu anuál 2023, tanba tuir lei ne’ebé aprova estatutu Provedór nian katak Provedór tenke tina-tinan hato’o relatóriu anuál ba PN tarde liu iha 30 juñu.

“Entaun, ohin ami mai entrega relatóriu ne’e ba PN liuhusi Prezidente PN, no ami hato’o katak ami prontu ona hetan notifikasaun husi PN atu bele mai hato’o relatóriu ne’e iha sesaun plenária,” nia dehan.

Mezmu nune’e, Virgílio Guterres, la esplika detallu kona-ba atinjimentu serbisu saida de’it mak aprezenta iha relatóriu ne’e maibé bainhira iha sesaun plenária iha PN tuir mai bele hato’o detallu liután.

Aleinde ne’e, iha hasoru malu ho PPN parte PDHJ mós entrega relatóriu despeza konta tanba tuir lei entidade públiku hotu hanesan PDHJ tenke aprezenta relatóriu konta ba Tribunál konta, tarde liu fulan-maiu.

Biban ne’e, Provedór PDHJ, hato’o apresiasaun ba PN liuhusi apoiu ne’ebé PN fó ba PDHJ durante ne’e iha eventu no intervensaun lubun ida ne’ebé PN hala’o inklui liuhusi Komisaun A trata asuntu Justisa no Konstituisionál ne’ebé envolve PDHJ iha diskusaun lei kona-ba ezersísiu direitu petisaun ne’ebé hetan ona aprovasaun iha finál globál.

Durante sorumutu, PDHJ mós troka hanoin ho PPN liga ba preokupasaun oinsá atu Timor-Leste instituisionaliza instituisaun protesaun testamuña.

“Ami hato’o ba Prezidente katak, lei ne’e iha maibé to’o agora ema seidauk hatene, ministériu ne’ebé mak atu implementa lei,” nia dehan

Tanba iha advokásia ba boa-governasaun nian, tuir nia, dalaruma iha informasaun atu hato’o maibé ema ta’uk tanba laiha protesaun ba sira, entaun hato’o ba PN bele hahú diskute oinsá instituisionaliza protesaun ba sasin sira.

Iha parte seluk, PDHJ hato’o sei halo komunikasaun ofisializa ho PN atu ratifika tratadu balun ne’ebé relasiona ho direitu umanu hanesan tratadu kona-ba direitu ema lakon forsadu no tratadu opsionál kontra tortura nian, tanba tratadu ne’e ita asina tiha ona.

Jornalista : Nelson de Sousa

Editór        : Cancio Ximenes

 

iklan
iklan

Leave a Reply

iklan
error: Content is protected !!