iklan

NASIONÁL, INTERNASIONÁL, DILI, HEADLINE, POLÍTIKA

PR Horta propoin Governu kria bairru diplomata

PR Horta propoin Governu kria bairru diplomata

Prezidente Repúblika, José Ramos Horta. Imajen Tatoli/Egas Cristóvão.

DILI, 07 juñu 2024 (TATOLI) – Prezidente Repúblika,José Ramos Horta propoin Governu kria bairro ba diplomata internasionál sira ho naran Bairro Diplomatiku.

“Governu tenke haree urjente, rai ne’ebé Estadu nian tenke hamamuk bainhira okupa husi komunidade sira, Governu bele halo edifísiu ida foun hodi fó aluga ba diplomata internasionál sira ne’ebé loke Embaixada iha ne’e, Governu bele kria bairru ida hanaran bairru Diplomata, nune’e diplomata sira kada fulan bele selu ba Estadu, bairua  ne’e só diplomata sira mak hela tau seguransa kompletu, ida ne’e bele tulun mós ita nia ekonomia,” tenik Horta bainhira hala’o enkontru ho jornalista sira iha Palásiu Prezidensiál Dili, sesta ne’e.

Nia dehan, bele mós Governu mak kria, ou empreza lokál  hanesan investimentu ida bainhira diplomata sira aluga osan ba empreza sira no selu taxa ba Estadu.

“Ita tenke kria bairru ida ho uma ne’ebé kualidade, jardin di’ak ho buat hotu iha laran kompletu, Governu mak kria mós bele, ou setór privadu mak halo mós bele, utiliza sira nia rai depois diplomata sira aluga. Iha rai barak Governu mak halo uma sira ne’e iha bairru ida ho naran bairro diplomata,” nia hatete.

Horta propoin asuntu ne’e tanba Embaxada husi nasaun amigu sira iha Timor-Leste iha fatin ne’ebé dook malu no nasaun sira hanesan Angola, Singapura, India, Inglaterra atu loke Embaxada iha Timor-Leste to’o agora rai laiha.

“Embaixadór Angola ho nia funsionáriu iha ona Timor-Leste, Embaixadór Singapura nia delegasaun mós iha ona Timor-Leste, maibé sira buka hela rai, rai seidauk iha ba sira, ida ne’e problema uitoan, di’ak liu Governu haree ona rai Estadu sira hodi harii Bairro Diplomatika ba ita nia diplomata internasionál sira,” nia katak.

Dadaun ne’e, Timor-Leste mós sei loke nia Embaixada iha India, Angola tanba desizaun ho orsamentu aprovadu ona no iha tempu besik sei haruka ona Embaixadór timoroan ba hala’o misaun diplomata.

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!