iklan

EKONOMIA, HEADLINE

SEF kuda ai-saria hun 500 hodi salva bee-matan Papapa iha Lautém

SEF kuda ai-saria hun 500 hodi salva bee-matan Papapa iha Lautém

Sekretáriu Estadu Floresta, Fernandino Vieira. Imajen Tatoli /Francisco Sony

DILI, 07 Juñu 2024 (TATOLI) – Sekretaria Estadu Floresta (SEF), Ajénsia Adventista Dezenvolvimentu no Asisténsia (ADRA, sigla inglés) no populasaun suku Savarika iha Lautém realiza atividade kuda ai-saria hun 500 iha área bee-matan Papapa, tanba volume bee komesa tuun.

Sekretáriu Estadu Floresta (SEF), Fernandino Vieira, haktuir katak bee-matan Papapa iha área Savarika ne’e dezde tempu portugés no nia mak fó moris ba populasaun sira iha Lautém. Tanba ne’e, Governu hamutuk ho ADRA realiza atividade kuda ai-saria hodi kontinua konserva bee-matan ne’e labele maran.

“Bee-matan Papapa ne’e konsidera bee ida nunka maran dezde tempu portugés. Bee ne’e maka fó moris ba populasaun iha Lautém, fornese ba irrigasaun hodi fó moris ba natar sira, apoia ba to’os sira, inklui fó moris ba animál no ai-horis sira”, Fernandino Vieira dehan ba Tatoli, ohin.

Tanba ne’e, liuhusi Loron Mundiál Ambiente, ne’ebé selebra iha 05 Juñu, ho tema ‘Salva Bee-Matan no Salva Futuru’’, hili bee-matan Papapa mak sai alvu ida atu hetan protesaun hodi kuda ai barak.

“Ita halo filafali atividade reflorestasaun iha bee-matan ne’e, tanba nia kondisaun hetan ona ameasa husi komunidade sira. Volume fornesimentu bee mós komesa menus. Ne’e, tanba ema barak maka tesi ai iha área bee-matan ne’e, animal barak maka mai han duut no ai-tahan sira tanba laiha lutu atu proteje. Tan ne’e ita hamutuk ho ADRA realiza atividade kuda ai ne’e atu salva fali bee-matan ne’e husi ameasa oioin”, nia salienta.

Governante ne’e realsa katak viveiru ai-saria ne’ebé kuda iha área bee-matan Papapa ne’e ai ne’ebé kategoria ai komérsiu. “Ai ne’e bele tahan iha tempu baioro naruk. nNinia tahan la maran maibé kontinua matak nafatin. Ne’e duni ho atividade kuda ai-saria ne’e bele konserva fali bee ho volume boot hodi fornese nafatin ba nesesidade iha Lautém”.

Ho atividade reflorestasaun ne’ebé la’o iha territóri ne’e, liuliu buka atu salva bee-matan sira ne’ebé hetan ameasa no parte SEF husu ba ADRA atu ajuda ministériu halo nafatin sensibilizasaun hodi buka halo konservasaun ba bee-matan sira iha suku alvu sira maka hanesan iha Soru, Maina Satu no Kakavei.

Sekretáriu Estadu solisita mós ba guarda florestál hamutuk na’in-22 iha Lautém ne’e atu nafatin serbisu ho responsabilidade hodi tau-matan ba área protejida sira, inklui bee-matan Papapa ne’e atu ai-saria sira ne’ebé kuda ona tenke moris no ai sira ne’ebé iha ona labele tesi arbiru husi komunidade.

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!