DILI, 07 juñu 2024 (TATOLI) – Prezidente Repúblika, José Ramos Horta, sesta ne’e, iha Palásiu Prezidensiál Dili realiza sorumutuk ho Jornalista destakadu Palásiu Prezidensiál hodi fahe esperiénsia kona-bá servisu Estadu no Governu nian durante ne’e.
“Ha’u rasik hakarak konvoka reuniaun ne’e ho ita-boot sira, kona-bá servisu sira Governu nian no desizaun Estadu nian hotu iha internasionál. Problema internasionál sira fó impaktu mai ita,” tenik Prezidente Horta ba Jornalista sira durante enkontru.
Nia dehan prosesu adezaun Timor-Leste nian ba ASEAN koordenasaun interministeriál husi Ministru Negósiu Estranjeiru no Kooperasaun (MNEK) maibé la’os sira mak foti desizaun só Konsellu Ministru no Prezidente Repúblika tanba adezaun ba ASEAN konsensu nasionál.
“Preparativu ita nian atu tama ba ASEAN la’o hela, tempu besik Governu mak konfirma ba lider sira ASEAN nian, Timor-Leste prontu ka la’e atu tama ba membru permanente iha 2025, maibé buat hotu Governu nia kompetensia, maibé ita mós tenke haree tratadu lubuk ida kuaze 60 ne’ebé presiza atu tau iha konsiderasaun. Maibé la’os de’it tratadu ne’e ita mós adapta hodi muda ita nia lei balu atu hanesan ho tratadu,” nia katak.
Prezidente dehan tan, “Iha direitu internasionál iha ita nia konstituisaun rasik hatete, direitu internasionál aas liu direitu nasionál, ne’e mundu hotu nune’e, signifika ita nia lei ne’ebé iha la kabe ho tratadu ne’ebé ita asina, la’ós tratadu mak atu muda, lei nasionál ne’e mak tenke muda atu adapta ba lei internasionál iha tratadu ne’e, liuliu ASEAN, buat sira ne’e sei han tempu, entaun Governu mak iha nia responsabilidade, Konsellu Ministru mak halo balansu”.
Tanba ne’e nia husu ba Governu atu halo avaliasaun multisetorál prontu ka la’e atu halo mudansa ba lei sira iha tratadu ne’ebé atu asina antes Timor-Leste adere ba ASEAN, lei sira hanesan, lei ba rai, lei ba investimentu no seluk tan.
Desizaun Timor-Leste nian iha rai li’ur
“Durante ha’u simu todan nu’udar Prezidente ha’u buka nomeia Embaxadór Timor nian ba nasaun sira iha liur ho kualidade, laiha presaun husi Partidu ruma ba ha’u atu tau sira nia ema, maibé ha’u nia intrese mak embaxadór ne’ebé ha’u hili tenke kualidade akademíku, esperiensia no profesionál,” Horta katak.
Nia dehan, dalaruma iha ema balu bele hasai doutoramentu no mastradu maibé laiha esperiensia klean, susar atu reprejenta nasaun hodi foti desizaun.
“Iha ha’u nia mandatu tau ema ne’ebé iha esperiensia, matenek no jerasaun foun hanesan Embaxadór Timor nian ba Singapura Alex Tilman, ema ne’ebé matenek no hala’o servisu kapas los, nia mastradu estuda iha Singapura duni, tinan lubuk ida ho Estadu Unidu, Embaxadór ba Roma Vatikanu, ida mós jerasaun foun agora iha ona Moçambique servisu di’ak los. Iha Nova Iorke ita tau Sr. Dionisio Babo ema ne’ebé matenek no servisu di’ak los,” nia tenik.
Dadaun ne’e Xefe Estadu sei fihir hela timoroan balun atu ba sai Embaxadór iha India, Abudabih no angola.
Durante nia mandatu tinan rua ona konsege dinamiza diplomasia Timor-Leste nian ne’ebé durante ne’e mate.
Kuaze oras ida enkontru ho Jornalista sira Xefe Estadu fahe de’it esperiénsia Estadu nian atu fó tulun ba Jornalista ka’er nudar referensia nune’e bele halo kobertura másimu liutan iha área servisu multilaterál nian.
Nune’e Prezidente husu atu enkontru regular ho jornalista sira hala’o kada fulan hodi aumenta jornalista sira nia materia ba koobertura asuntu importansia sira nasaun nian.
Jornalista: Hortencio Sanchez
Editór: Florencio Miranda Ximenes
