DILI, 09 juñu 2024 (TATOLI)–Servisu Edukasaun munisípiu Manatuto hamutuk ho Prezidente Autoridade Munisípiu (PAM) Manatuto koloka ona profesór rekrutadu hamutuk 29 liuhusi programa bolsa kandidatu ba eskola 15.
“Ne’ebé koloka hotu ona ba eskola sira ne’ebé identifika hanesan krítiku no muito krítiku. Agora sira komesa hanorin semana ida ona,” Diretór Servisu Edukasaun munisípiu Manatuto, Patrício da Cruz Quintão, informa ba Agência Tatoli, via telefónika, segunda ne’e.
Notísia relevante : Eskola 20 de Agosto Ermera la simu profesór bolsa kandidatu destakadu
Durante prosesu kolokasaun bolsa kandidatu profesór la’o di’ak tanba laiha profesór mak rezigna-an.
“Profesór na’in-rua troka fatin de’it ho profesór iha munisípiu seluk, maibé ida-ne’e la’ós ita mak haruka maibé konkordánsia entre profesór ho profesór iha munisípiu sira,” nia akresenta.
Profesór Bolsa kandidatu na’in-29 ne’e ba aprezenta-an iha Diresaun Edukasaun no Prezidente Autoridade munisípiu (PAM) Manatuto iha loron 21 maiu. Profesór sira ne’e hahú ba aprezenta-an iha eskola iha loron 24 maiu.
Jornalista : Osória Marques
Editora : Julia Chatarina
