iklan

INTERNASIONÁL, HEADLINE

Primeiru-Ministru dezloka bá Jenebra hodi partisipa Fórum Líder Globál

Primeiru-Ministru dezloka bá Jenebra hodi partisipa Fórum Líder Globál

Primeiru-Ministru, Kay Rala Xanana Gusmão. Imajen Tatoli/Egas Cristovão

DILI, 09 Juñu 2024 (TATOLI) – Primeiru-Ministru (PM), Kay Rala Xanana Gusmão, dezloka ohin bá Jenebra-Suísa hodi partisipa Fórum Líder Globál, iha ámbitu aniversáriu UN Trade and Development (UNCTAD) ba da-60.

Iha fórum ne’ebé sei realiza entre, loron 12 no 14 Juñu ne’e, atu Define Meta Dezenvolvimentu Foun Perante Mudansa Mundu Nian.

Tuir nota imprensa husi Governu, fórum ida-ne’e reprezenta momentu importante ida, hanesan oportunidade di’ak ida atu halo reflesaun kle’an kona-ba buat ne’ebé aprende hamutuk durante dékada neen ikus no hamutuk Define Meta Dezenvolvimentu Foun bá oin.

“Konferénsia ne’e sei halibur líder sira mai husi mundu tomak, reprezentante mai husi nasaun oioin ho interese hanesan, hotu-hotu unidu ho objetivu hanesan atu define hikas meta dezenvolvimentu iha mundu, liuliu bem-estar ema hotu-hotu nian sai nafatin asuntu prinsipál no fundamentál”, dokumentu ne’e dehan.

Eventu ne’e diskute mós dezafiu no oportunidade prinsipál liga ba dezenvolvimentu sustentavel no halo advokasia ba planu polítika foun ba dimensaun globál, rejionál no lokál.

Nota ne’e salienta konferénsia ne’e sei diskute mós estratejia atu hamoris hikas kreximentu sustentavel no inkluzivu hodi bele taka dezafiu sira ne’ebé aumenta ba beibeik.

“Sira sei buka maneira no sentidu oinsá reforma no hametin multilateralizmu iha sékulu-21”, dokumentu ne’e hateten.

Durante esplorasaun estratejia foun ba dezenvolvimentu, Fórum Líder Globál sei foka liu ba iha tratamentu integradu UNCTAD nian ba komérsiu no dezenvolvimentu, inklui asuntu sira ne’ebé iha ligasaun ba malu entre ida ho ida seluk, inklui finansa no teknolojia investimentu, no dezenvolvimentu sustentavel.

Fórum ne’e partikularmente sei fó resposta ba nesesidade nasaun dezenvolvida sira, partikularmente país sira ne’ebé menus dezenvolvidu, Estadu illa ki’ik dezenvolvidu sira, no país avansadu sira ne’ebé laiha área rai-maran.

“Define Meta Dezenvolvimentu Foun Perante Mudansa Mundu Nian hanesan esklamasaun ida atu hola asaun hodi hanoin filafali dezenvolvimentu iha tempu poliglobalizasaun. Iha medida ne’ebé ita halo adaptasaun husi dezenvolve futuru ida reziliente, justu no sustentavel”, komunikadu ne’e realsa.

UNCTAD hanesan Organizasaun Komérsiu no Dezenvolvimentu ne’ebé sai mós hanesan organizasaun intergovernamentál ida iha Sekretariadu Organizasaun Nasaun Unida (ONU) nian ho misaun promove interesse país dezenvolvidu sira perante komérsiu mundiál.

Lembra katak iha Juñu 2024, UNCTAD selebra loron aniversáriu ezisténsia ba da-60.

TATOLI

iklan
iklan

Leave a Reply

iklan
error: Content is protected !!