Deputada CNRT husu SEFOPE hamatan traballadór timoroan hetan violénsia iha Korea
DILI, 10 juñu 2024 (TATOLI)—Deputada CNRT iha Parlamentu Nasionál (PN), Cedelízia Faria dos Santos, husu Ministériu Negósiu Estranjeiru no Kooperasaun (MENK) ho Sekretária Estadu Formasaun Profisionál no Empregu (SEFOPE) liuhusi serbisu adidu atu tau matan ba traballadór timoroan balun ne’ebé hetan violasaun husi empregadór.
“Ha’u-nia intervensaun ohin, hakarak foka liu ba ita-nia traballadór sira-ne’ebé serbisu iha rai-li’ur, espesialmente maluk traballadór timoroan sira-ne’ebé serbisu iha nasaun Korea. Ha’u triste loos, bainhira ita akompaña iha mídia sosiál ne’ebé mak fó sai ita-nia maluk timoroan sira iha ró ahí laran ou bero laran ne’ebé serbisu hela, no koreanu halo violénsia ba sira hodi tuku no tebe. Ita hanesan timoroan sente triste ho hahalok sira violasaun sira-ne’ebé mak sira (traballadór timoroan) hasoru iha ema-nia rai,” Nia levanta liuhusi reuniaun plenária Parlamentu, segunda ne’e.
Nia dehan, Timor-Leste rekoñese remesa ka osan hatama husi traballadór timoroan sira iha rai-li’ur ne’ebé sira haruka ba sira-nia família ne’ebé halo mós dezenvolvimentu ba sira-nia família no nasaun boot tebe-tebes, hanesan tuir dadus ne’ebé iha tinan 2023 hatudu katak traballadór timoroan sira haruka remesa osan millaun $204-resin.
Tanba ne’e, Deputada husi bankada Governu ne’e husu Ministériu Negósiu Estranjeiru no Kooperasaun (MNEK) no Sekretária Estadu Formasaun Profisionál no Empregu (SEFOPE) liuhusi ita-nia adidu no konsoladu atu tau matan ba timoroan sira, no halo mós koordenasaun di’ak ho Governu Korea hodi iha liña koordenasaun ida di’ak entre Governu rua ne’e, nune’e fiar katak bele minimiza aktu sira-ne’ebé sira hasoru.
“Ita rekoñese la’ós iha Korea de’it, iha mós nasaun sira seluk, ita-nia maluk timoroan sira serbisu ba sira hasoru problema barak iha sira ninia vida,” nia dehan.
Vise Ministru ba asuntu Parlamentár, Adérito Hugo da Costa, rejista preokupasaun husi membru PN sira-nian ne’e hodi enkamiña ba entidade tutela.
Jornalista : Nelson de Sousa
Editór : Cancio Ximenes
