POLÍTIKA

Deputada FRETILIN husu Governu presiza apoiu dezenvolvimentu setór privadu

Deputada FRETILIN husu Governu presiza apoiu dezenvolvimentu setór privadu

Uma Fukun Parlamentu Nasionál,Imajen Egas Cristovão

DILI, 10 juñu 2024 (TATOLI)—Deputada FRETILIN, Cristina Costa Dias Quintas, hateten iha konstituisaun define setór privadu nu’udar ai-riin importante hodi dudu ekonómia nasaun maibé Governu la tau importánsia.

“Fulan 11 liu ona, ita sei kontinua rona katak Governu ladauk iha polítika ida klaru ba dezenvolvimentu setór privadu,” Deputada FREILIN ne’e hato’o liuhusi deklarasaun polítika iha reuniaun plenária Parlamentu, segunda ne’e.

Iha programa Governu Konstitusionál da-sia (IX) haktuir; “o setor privado, independentemente da sua vocação e dimensão, é e será um dos principais motores da economia nacional” no “uma economia privada, saudável, sustentada e com prestação de contas rigorosas, fornecerá ao país, grande parte da receita fiscal, que será determinante para sustentar o orçamento geral do Estado e solucionar os principais problemas sociais de TimorLeste”,  hanoin ida-ne’e ambisiozu bainhira ita haree de’it husi indikadór ida-ne’ebé hanaran formasaun  bruta kapitál fiksu  ne’ebé setór privadu nasionál halo liuhusi sira-nia investimentu rasik foin 5% husi produtu internu brutu.

Bankada FRETILIN hakarak hatene signifikadu no faktu konkretu ka ezemplu kuandu temi konaba “uma economia privada” ne’ebé sei fornese ba país ida-ne’e reseita fiskál boot tebes hodi sustenta OJE atu solusiona problema sosiál iha Timor-Leste.

Bainhira Governu aprezenta nia programa durante debate OJE 2024 iha Parlamentu ida-ne’e, hateten kona-ba meta ne’ebé ambisiozu sei alkansa iha tinan lima (5), hanesan meta ida mak atu hasa’e kresimentu ekonomia la’ós minarai ba 5%.

Maibé, nia dehan, nota katak previzaun husi ADB hatudu ba tinan 2024 ne’e, kresimentu ekonomia karik bele to’o deit 3,4% no iha tinan 2025 bele to’o 4,1%. Ida-ne’e mós mai husi aumentu iha despeza públika no konsumu, la’ós husi setór privadu hanesan temi iha programa ne’e, tanba haree didi’ak relatóriu ekonómiku husi banku mundiál, projesaun husi ADB ne’e ladún diferensa.

“Maibé, buat ida instituisaun multilaterál rua ne’e alerta mak ne’e, kresimentu bele tun bainhira iha inflasaun iha presu komoditi iha rai-li’ur, tanba presu mina-rai hahú sa’e implika mós aumentu iha presu sasán ne’ebé Timor-Leste sosa barak liuhusi rai-li’ur. Probabilidade presu mina-rai sa’e ne’e tanba funu iha médiu oriente ne’ebé bele alastra to’o Iraun, ne’ebé bele hapara produsaun mina-rai. Situasaun idéntiku akontese tiha ona ho funu iha Ukránia ho Rúsia lori konsekuénsia presu ai-han sa’e makaas iha mundu no afeta mós ba Timor-Leste,” nia dehan.

Ho nivel ezekusaun orsamentál OJE 2024 iha trimestre dahuluk 11%, no to’o ohin foin mak atinje 21% em-termu reais, signifika katak efeitu husi despeza publika mós kiik tebes atu dudu kresimentu to’o 5%.

Nia preokupa, ezekusaun orsamental kiik ida ne’e akontese iha momentu ida ema barak lakon sira-nia rendimentu no la hatene oinsá atu selu sira-nia tusan iha banku ka familia sira, tamba despeju administrativu foin lalais ne’e afeta mós ba sira-nia atividade ekonómika loroloron nian.

Balun haree sira-nia kreatividade lakon leet de’it no lahatene loos seguransa ba sira-nia negósiu sei oinsá loos aban bainrua nian, negósiu ki’k ne’ebé sira halo ne’e mai duni husi sira-nia esforsu rasik, dala barak uza osan rasik la’ós depende ba Governu nia tulun.

“Objetivu ida husi programa Governu Konstitusionál da-sia (IX) mak melhorar as políticas de empreendedorismo nacionais,…, remover os obstáculos e apoiar o empreendedorismo, saida mak ita asiste, kontradisaun husi buat ne’ebé hakerek furak loos iha programa ne’e,” nia dehan.

Nia husu Governu atu fó konfiansa ba investidór nasionál no estranjeiru sira bainhira setór privadu rasik sei halerik ba estatutu rai no fasilita kréditu ba setór privadu.

Deputada CNRT, Cedelísia Farria dos Santos, hateten programa Governu ne’e tinan lima (5), la’ós tinan ida no fulan 10, ne’ebé programa Governu tinan lima (5) no labele obriga fulan 10  ne’e buat hotu tenke halo kedas.

Iha parte seluk, Prezidente komisaun C trata asuntu Finansa Públika ne’e, fó sai katak tuir portál transparánsia daudaun ne’e iha persentajen ezekusaun Orsamentu Jerál Estadu (OJE) 2024, se la inklui komitmentu nian ne’e atinji 27%, se inklui komitmentu nian ne’e atinji 37%, entaun dehan fali 21% ne’e la loos.

“Ha’u mós hakarak hato’o, horibainhira ita-nia ministra finansa mai rezeita tiha ona dadus ADB fó ne’e, tanba tuir dadus ida PIB naun petrolífeiru husi Ministériu Finansa bainhira submete orsamentu mai ne’e hatete katak, 2024 ne’e ita atinji 4,1%. Iha fulan ida ba kotuk ka semana tolu ba kotuk, ha’u rona husi Banku Sentrál mós sira ninia previzaun 2024 ita atinje 4,1% hanesan ho Ministériu Finansa (MF) nian, la’ós 3,4% hanesan ADB fó sai liuhusi notísia ne’ebé ita akompaña,” nia hateten.

Tuir Ministériu Finansa (MF) nian iha 2025 ne’e atinje 4,9%, ne’ebé keta haluha iha tinan 2020 ne’e Produtu Internu Bruto (PIB) atinje negativu 8,6, ne’e istória karik foin akontese boot tebe-tebes, nune’e foti dadus antigu hodi halo reflesaun ba oin.

Vise Ministru ba asuntu Parlamentár, Adérito Hugo da Costa, hateten Governu konstitusionál da-sia (IX) mai kaer ba kompromisu halo diagnóstika iha setór ida por ida saida mak halo ba setór privadu, dahuluk respeitu no konsidera sira-nia dezempeñu kontinua isentiva sira atu partisipa iha obra sira Governu hodi fó oportunidade no kapasita sira nia aan la’ós fó de’it ba kompañia internasionál.

“Insentiva ne’ebé hateten kona-ba pakote pakote referendu projetu 800-resin iha territóriu nasionál tomak, PDD 1 no 2, la’o atu insetiva setór privadu sira. Agora tempu duni ita halo avaliasaun duni, to’o iha ne’ebé setór privadu sira. Ita halo duni avaliasaun kontribuisaun insentiva ne’ebé Estadu fó tinan 20-resin ba setór privadu partisipa iha obra sira-ne’e ninia benefísiu saida, sira iha ne’ebé ona, investimentu ne’ebé fó ba sira halo projetu boboot sira investe iha ne’ebé,” nia hateten.

Laiha lei ba garantia, nia dehan, nune’e Governu aprova ona proposta-lei ba garantia ninian no tempu badak submete mai PN, tanba problema ida garantia ba emprestimu ka seguransa laiha ba emprestimu tinan barak nia laran.

“Husu Deputadu sira bainhira proposta-lei ne’e haruka mai PN baixa ba komisaun atu halo andamentu lala’is, tanba ne’e ita atu insetiva setór privadu inklui atividade familiar sira-nian, hola parte husi diagnóstika ba papél setór privadu iha dezenvolvimentu ekonómiku nian,” nia hateten.

Governu konstitusionál da-sia (IX) hakarak dezde inísiu partisipasaun Kámara Komérsiu Indústria Timor-Leste (CCI-TL, siglá portugés) iha atividade sira iha setór privadu hodi sira bele iha baze dadus lori hatene dezempeñu kada emprezáriu nasionál.

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!