Empreza perisos submete ona dokumentu subsídiu foos
DILI, 10 juñu 2024 (TATOLI) – Diretora Nasionál Regulasaun Komersiál iha Ministériu Komérsiu no Indústria (MCI), Manuela da Silva Tilman, hateten Empreza Perisos submete ona dokumentu foos subsídiu ba Governu atu halo verifikasaun.
‘’Ita haree katak empreza rua Alfa no Kreativu Furak sira-nia prosesu dokumentu hotu ona no submete ona ba MKAE, agora ba Perisos ninia ne’ebé mak ami manda ona karta ba sira no prepara sira-nia dokumentu no sira kumpre no hatama iha semana kotuk no daudaun ne’e ekipa sira sei verifika hela”, Manuela da Silva Tilman ba TATOLI iha nia kna’ar fatin, ohin.
Nia afima, ekipa sira verifika hela no semana ida-ne’e hotu, submete ba Ministériu Koordenadór asuntu Ekonómiku atu bele prosesa pagamentu.
“Ha’u sente katak la to’o semana ida, prosesu ba sira-nia dokumentu bele hotu ona maibé hakarak hateten katak sira mós tenke garante ba ami katak sira-nia dokumentu ne’ebé mak prepara fó mai ami ne’e, tenke lolos no tenke kompleta, ba ami laiha problema, banhira sira hatama mak buat hotu loos, ita bele submete ba MKAE hodi prosesa pagamentu”, nia haktuir.
Antes ne’e, Ministru Prezidénsia Konsellu Ministrus, Agio Pereira, hanesan Ministru Koordenadór asuntu Ekonómiku ein-ezersísiu, asina akordu ho empreza lima kona-ba importadora ai-han sira, hodi implementa intervensaun temporária ba estabilizasaun folin foos iha merkadu.
Akordu hirak ne’ebé selebradu, ho objetivu mak atu asegura presu foos importadu, ne’ebé fa’an iha armajen empreza nasionál nian, sira ne’ebé fa’an kuantidade boot, hodi fiksa ho montante másimu $12 ba kada saku ka parsela 25 kg, atu permite fa’an-rahun foos ho folin másimu $0,50 kada kilograma.
Hodi kumpre limite presu másimu ida-ne’e, empreza nasionál sira ne’ebé fa’an foos ho kuantidade boot ka operadór ekonómiku nasionál sira ne’ebé importa foos ho kuantidade boot sei simu subsídiu ho valór $5 kada saku ka parsela 25 kg, ne’ebé korresponde ho sentavu 20 ba kada kilograma foos nian.
Atu hetan subsídiu, empreza tenke submete pedidu pagamentu, akompaña ho kópia ne’ebé hetan autentifikasaun hosi Autoridade Aduaneira, ne’ebé komprova katak importasaun produtu tuir espesifikasaun no períodu ne’ebé define ona iha Dekretu-Lei nú 76/2023, loron 29 fulan-Setembru, ne’ebé estabelese medida ida-ne’e.
Empreza lima ne’ebé formaliza ona akordu ho Governu mak Perissos Victoria Lda., Loja Kreative Furak Lda, Lisun Importasaun no Exportasaun Lda., Jusibel Unipessoal Lda no Alfa Dili Unipessoal Lda. Maibé hosi implementasaun subsídiu ne’e empreza tolu mak kumpre hanesan Perissos Victoria Lda, Loja Kreative Furak Lda no Alfa Dili Unipessoal Lda.
Jornalista : Felicidade Ximenes
Editór : Zezito Silva
