iklan

DEFEZA, HEADLINE

 F-FDTL-PNTL asina akordu operasaun konjunta iha ámbitu vizita Papa Francisco

 F-FDTL-PNTL asina akordu operasaun konjunta iha ámbitu vizita Papa Francisco

Xefe Estadu Maiór F-FDTL, Tenente Jenerál Falur Rate Laek. Imajen Tatoli/Antonio Daciparu

DILI, 10 juñu 2024 (TATOLI) – Komandu FALINTIL-Forsa Defeza Timor-Leste (F-FDTL) no Komandu Jerál Polísia Nasionál Timor-Leste (PNTL), estabelese akordu operasaun konjunta atu fó seguransa ba vizita Amu Papa Francisco mai Timor-Leste.

Akordu operasaun konjunta ne’e bazeia ba rezolusaun Governu, númeru 22/30 abríl 2024, atu husu ba Komandu F-FDTL no PNTL hodi servisu hamutuk iha ámbitu vizita Amu Papa mai Timor-Leste.

“Ami-nia preparasaun ne’e laiha problema ba seguransa sempre prontu no ohin ami to’o ona iha faze asina karta, kona-ba operasaun konjunta”, Xefe Estadu Maiór Jenerál F-FDTL, Tenente Jeneral, Domingos Raul Falur Rate Laek, ba jornalista sira hafoin reuniaun ho Komandante Jerál PNTL Komisáriu Jerál Polísia Henrique da Costa iha Kuartel Jenerál F-FDTL Fatuhada, Segunda, ohin.

Jenerál Falur hateten, seguransa ne’e la’os forsa ho polísia mesak mak halo seguransa, maibé povu tomak iha Timor-Leste, seguransa ne’e responsabilidade ema hotu nian, seguransa ne’e la’os igreja de’it no laos sarani, Polisia no F-FDTL de’it, maibé povu hotu nia kontribuisaun atu fó susesu ba vizita Santo Padre.

“Atu komanda ne’e, ami rua mak komanda, mais iha forsa tarefa iha ne’ebá ne’e, ami-nian F-FDTL horibainhira indika ona komandante komponente terrestre “Dobu”, nia mak sei koordena ho komandante operasaun polísia ne’ebé ba hamutuk iha ne’ebé. No akordu ida ohin ami asina ne’e atu lao tuir regra sira ne’ebé sei halo iha operasaun ida-ne’e, maibé kona-ba seguransa ne’e ema hothotu nian”, nia adianta.

Falur subliña, Komandu F-FDTL no PNTL deside estabelese Sentru Operasaun iha Kuartel Jerál PNTL Caicoli.

“Ekipa seguransa husi parte rua F-FDTL no PNTL mós sei halo simulasaun molok prezensa Amu Papa mai Timor-Leste”, nia informa.

Iha fatin hanesan, Komandante Jerál Polísia Nasionál Timor Leste, Komisáriu Jeral Polísia  Henrique da Costa, dehan Komandu F-FDTL no PNTL asina diretiva konjuta ida ba operasaun konjunta relasiona seguransa vizita Amu Papa.

Nia esplika, seguransa iha Dili sei iha komandu rua, sei kontrola hosi Unidade Polísia Espesiál, Komandu Dili, inklui Kuartel Jerál hamutuk ho Polísia Militár halo hela atividade patrolla no movimentu hodi observa, atu iha buat ruma sira bele komunika kedas mai.

“Ohin ami-nia enkontru daruak no iha enkontru ne’e ita asina dokumentu ida no ita sei instala ekipa traballu konjunta iha Kuartel Jerál PNTL hodi implementa diretiva ne’ebé iha, servisu balun lao tiha ona, kona-ba prevensaun nian lao tiha ona liuliu ita halo atividade formasaun, maske idaidak halo ninian, maibé intensaun ne’e ba vizita Amo Papa nian”, nia afirma.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!