DILI, 10 juñu 2024 (TATOLI) – Fundu Emerjénsia Nasoens Unidas ba Labarik (UNICEF) no Ministériu Koordenadór Dezenvolvimentu Rurál asina ona akordu ida hodi apoia ba programa labarik iha Timor-Leste.
Reprezentante UNICEF iha Timor-Leste, Bilal Durrani, hateten kooperasaun mantein ho Governu Timor-Leste kona-ba programa labarik sira hanesan: Edukasaun, Saúde, Saneamentu, ijiene, prevensaun violasaun hasoru feto, labarik-feto no labarik sira.
“Ita servisu hamutuk ho Governu Timor-Leste dezde tinan 2004 no ami servisu iha programa oioin ba labarik sira. Ho akordu ne’e, ami hametin ami-nia kooperasaun atu implementa programa sira hanesan Edukasaun, Saúde, Bee no Saneamentu, ijiene, edukasaun sedu, prevensaun ba violasaun hasoru feto, labarik-feto no labarik sira”, Bilal Durrani, hateten ba jornalista sira iha Palásiu Governu, ohin.
Iha oportunidade ne’e, UNICEF apresia Vise Primeiru-Ministru no Ministru Koordenadór Dezenvolvimentu Rural, Mariano Assanami Sabino, nia servisu hodi fó atensaun ba labarik sira-nia programa no asaun atu hadi’a labarik sira-nia moris-di’ak iha Timor-Leste.
“UNICEF kompromete atu kontinua fó apoiu ba programa labarik sira-nian atu hadi’a má nutrisaun hodi haforsa kualidade nutrisaun iha preparasaun ba jerasaun foin-sa’e sira hodi kontribui ba dezenvolvimentu nasionál Timor-Leste nian iha futuru”, nia hateten.
Iha fatin hanesan, Vise-Primeiru-Ministru no Ministru Koordenadór Dezenvolvimentu Rural, Mariano Assanami Sabino, afirma asinatura akordu ida-ne’e atu promove direitu labarik sira-nian.
“UNICEF no Ministériu Dezenvolvimentu Rurál servisu hamutuk atu hadi’a má nutrisaun labarik sira iha Timor-Leste”, Assanami salienta.
Nia informa katak Governu hamutuk ho parseiru sira hodi investe maka’as ba labarik sira-nia programa atu asegura kualidade nutrisaun ho objetivu atu prepara sira atu mantein dezenvolvimentu sustentavel Timor-Leste nian iha futuru.
“Tanba ne’e ha’u agradese ba UNICEF liuhosi reprezentante iha TL ne’ebé durante ne’e fó apoiu ba programa labarik sira inklui hadi’a má nutrisaun iha Timor-Leste”, nia konklui.
Jornalista : Felicidade Ximenes
Editór : Zezito Silva
