iklan

EKONOMIA, HEADLINE

Hare iha natar ektare 135 lakon nia kualidade

Hare iha natar ektare 135 lakon nia kualidade

Diretór Nasionál Agrikultura no Ortikultura MAPPF, Lúcio Ribeiro. Imajen Tatoli/Egas Cristóvão

DILI, 10 Juñu 2024 (TATOLI) – Udan ne’ebé tau iha semana kotuk afeta ba hare ne’ebé kuda ona iha natar ektare 135 iha munisípiu Ainaro no Covalima, tanba bainhira dulas ba foos sei rahun no labele rai kle’ur iha armazein tanba sei sai aat.

Diretór Nasionál Agrikultura no Ortikultura, Ministériu Agrikultura, Pekuária, Peska no Floresta (MAPPF), Lúcio Ribeiro, informa katak hare isin iha natar ektare 135 ne’e, 100 mak kolleta ona no 35 seidauk.

“Hare kuaze ektare 100 mak ita-nia agrikultór sira kolleta tiha ona iha Ainaro, maibé sira tau hela iha natar laran. Foin lalais udan-boot tau ne’e hoban hotu hare sira ne’e, entaun bainhira lori bá dulas sei lakon nia kualidade tanba sei rahun hotu”, Lúcio Ribeiro dehan iha Comoro, ohin.

Ba hare isin iha natar ektare 35 iha Covalima ne’ebé seidauk kolleta, maibé bee nakonu tiha natar laran, entaun sei fó impaktu ba nia kualidade atu asegura iha armazein ka distribui ba populasaun iha Timor-Leste atu konsumu.

“Kuandu hare ne’ebé ko’a ona tenke lori bá asegura iha fatin ne’ebé maran ka mahon, signifika presiza tau iha uma ruma ne’ebé labele kona udan, nune’e bele garante nia kualidade. Maibé, agrikultór sira lahalo ida ne’e, entaun impaktu maka produsaun ba époka dahuluk iha Ainaro no Covalima sei afeta ba kuantidade produsaun”, dehan.

Tanba ne’e, nia husu ba tékniku agríkola iha munisípiu rua ne’e, inklui iha munisípiu sira seluk ne’ebé halai natar atu tau atensaun ba hare sira ne’ebé kolleta ona no tenke orienta agrikultór sira atu lori produtu ne’e bá  fatin ne’ebé seguru.

Ministru Agrikultura, Pekuária, Peska no Floresta, Marcos da Cruz, haktuir katak, iha semana kotuk, nia bá hala’o atividade kolleta hare iha Ainaro no Covalima, maibé udan iha parte kosta súl maka’as no natar lubuk ida iha área Tafara to’o iha Oebaba kuaze bee estraga hotu.

“Daudaun iha kosta súl udan, maibé ita seidauk rona iha área Viqueque. Tanba ne’e maka ita orienta ona dirijente sira atu aprezenta dadus atu ita bele hatene hodi halo mós intervensaun lalais molok afeta maka’as ba natar sira seluk iha territóriu laran”, realsa.

Ministru salienta katak iha Tafara hare iha natar ektare 30 mak moris, maibé seidauk funan no maske udan hoban tiha, maibé espera katak hare sira ne’e bele moris di’ak.

Jornalista: Tomé Amado  

Editora: Maria Auxiliadora

iklan
iklan

Leave a Reply

iklan
error: Content is protected !!