DILI, 10 Juñu 2024 (TATOLI) – Ministériu Agrikultura, Pekuária, Peska no Floresta (MAPPF) halo, entre Janeiru no Juñu, avaliasaun ba dezempeñu serbisu funsionáriu kazuál 680, atu hatene progresu saida mak sira halo ona iha fulan neen nia laran, nune’e bele iha desizaun ba kontinuasaun serbisu ba fulan sira tuirmai.
Ministru Agrikultura, Pekuária, Peska no Floresta, Marcos da Cruz, hateten avaliasaun ne’ebé halo ba funsionáriu kazuál sira ne’e bazeia ba despaxu ministru nian ne’ebé hato’o ba diretór nasionál sira.
Tuir governante, avaliasaun ne’e importante duni tanba serbisu ne’ebé tutela iha área haat hanesan Agrikultura, Pekuária, Peska, no Floresta ne’e konsidera nu’udar dapur ba nasaun no dapur ba Estadu nian. Tanba ne’e, presiza iha rekursu umanu ne’ebé bele hala’o serbisu tékniku iha terrenu hodi fó rezultadu di’ak ba ministériu.
“Atu hetan filafali kontratu ba faze daruak nian, ita presiza hetan relatóriu avaliasaun husi fulan neen bá kotuk, depois mak ita bele kontinua realiza kontratu ho funsionáriu kazuál sira ba fulan neen tuirmai”, Marcos da Cruz realsa hafoin enkontru ho funsionáriu kazuál, iha Comoro, ohin.
Governante ne’e husu ba diretór sira atu submete relatóriu avaliasaun no bainhira atu kontrata fali presiza haree lai dezempeñu serbisu funsionáriu idak-idak nian. “Ha’u husu ona diretór sira atu prepara relatóriu kada funsionáriu nian kona-ba progresu serbisu no lista prezensa kazuál sira-nian, nune’e ha’u bele hatene saida maka sira halo ona durante fulan neen nia laran molok ha’u asina sira-nia kontratu”, salienta.
Liuhusi prosesu avaliasaun ne’ebé kada diresaun halo ba kazuál sira hatudu rezultadu di’ak maka sei hetan kontinuasaun ba kontratu, maibé rezultadu balun la hatudu progresu di’ak maka ministériu sei hapara sira.
Iha fatin hanesan, Sekretáriu Estadu Peska, Domingos dos Santos, husu ba funsionáriu kazuál hotu atu hatudu vontade no kompromisu hodi hala’o serbisu, tanba ida ne’e maka sai alvu prinsipál atu lori ministériu ne’e ba progresu.
“Ita hatene katak osan ne’ebé ita simu ne’e povu nian. Agora, resposta saida maka ita atu fó ba povu? Ita presiza hatudu iha dezempeñu serbisu sira ne’ebé halo ona iha fulan neen nia laran. Matenek ne’ebé iha tenke investe liuhusi rezultadu serbisu loroloron nian, maibé matenek ne’ebé iha kuandu la uza ho di’ak hodi halo koordenasaun ho ema seluk hodi atinje meta ida iha ministériu nia laran ne’e bele konsidera katak ne’e saugati de’it no seidauk to’o”, dehan.
Tanba ne’e, nia espera husi avaliasaun ne’ebé ministériu hahú halo daudaun ba serbisu sira ne’ebé funsionáriu kazuál sira halo iha fulan neen nia laran, fiar katak sei hatudu rezultadu ne’ebé di’ak, nune’e bele iha nafatin konfiansa hodi kontinua hala’o knaar.
“Maibé iha avaliasaun sira ne’e maka balun serbisu ladi’ak, automatikamente sei hapara duni ninia kontratu, nune’e bele fó fali oportunidade ba ema seluk”, afirma.
Jornalista: Tomé Amado
Editora: Maria Auxiliadora
