iklan

MUNISÍPIU, SAÚDE, VIQUEQUE

PAM Viqueque husu Xefe Sentru Saúde foun servisu ho domin

PAM Viqueque husu Xefe Sentru Saúde foun servisu ho domin

Imajén Tatoli/Vitorino Lopes da Costa

VIQUEQUE, 10 juñu  2024 (TATOLI)- Prezidente Autoridade Munisípiu Viqueque, Francisco C.S Gonzaga Soares, enkoraja xefe sentru saúde foun iha Viqueque Vila atu mellora liután servisu ho profisionál hodi fó atendimentu ba komunidade sira ho domin.

Xefe sesante servisu sentru saúde postu Viqueque Vila, Celestina da Costa Alves, hatudu ona nia prestasaun servisu tinan 16, ohin husik ona nia kargu no troka husi xefe sentru João Corte Real.

“Ha’u hakarak husu xefe foun sentru tenke servisu ho profisionál hodi fó atendementu ba ita-nia komunidade sira iha postu ida-ne’e ho homin”,  Francisco C.S Gonzaga Soares, hateten iha serimónia pose ne’e iha sentru saúde postu Viqueque Vila, ohin.

Prezidente Autoridade dehan asume kna’ar nu’udar servidór ka  ukun ida-ne’e hodi serve ba komunidade Viqueque Vila tomak, nune’e labele haree ba kór no ras ruma.

“Nune’e, ha’u lori autoridade munisípiu Viqueque husu agradese ba xefe sesante tanba durante ne’e hatudu ona prestasaun saúde ba komunidade Viqueque Vila. Ha’u espera ba oin servisu saúde sira Viqueque Vila nafatin kontribui matenek ba dezenvolvimentu saúde iha munisípiu Viqueque”, nia hato’o.

Iha fatin hanesan,  Xefe Sentru Saúde sesante Postu Viqueque Vila, Celestina da Costa Alves, husu agradese ba pesoal saúde  sira-ne’ebé durante ne’e servisu hamutuk iha sentru saúde Vila no ba oin   sei servisu hamutuk ho xefe sentru foun hodi lori sentru saúde Viqueque Vila.

“Ha’u husu agradese ba profisionál saúde no lideransa komunitária sira durante tinan 16 nian ne’ebe servisu no koopera di’ak malu retes. Husu nafatin atu mantein kooperasaun ka servisu hamutuk ho xefe sentru foun hodi fó asistensia servisu saúde ba ita-nia komunidade ho di’ak,” nia enkoraja.

Garante atendimentu ba komunidade

Xefe Sentru Saúde foun Postu Viqueque Vila, João Corte Real, afirma bazeia ba Dekretu-Lei Komisaun Funsaun Públika (KFP) númeru 61/82/2024, hodi simu nomeasaun sai xefe sentru saúde postu Viqueque Vila ne’ebé hala’o iha edifísiu  Ministériu Saúde (MS), loron 3 Juñu 2024.

“Nune’e, ba kna’ar ida-ne’e ha’u sei tau atensaun ba disipliña servisu, etika servisu profisionál, responsablidade ba profisionál saúde sira iha sentru saúde no sei hatudu nasionálizmu no patriotizmu.  Ho responsavél ida-ne’e ha’u sei servisu hamutuk ho xefe sentru saúde sesante no pesoal saúde sira hodi lori servisu saúde ka  atendementu hakbesik ba komunidade sira. Oportunidade ne’e ha’u hakarak apela ba pesoal saúde sira  servisu hamutuk no labele haree ba kór, maibé hatudu ita-nia profisionál saúde”, katak nia.

Iha Sentru saúde Viqueque Vila  fasilidade maka hanesan postu saúde hamutuk 12, Klínika ida, maternidade  no internamentu ida ho totál pesoal saúde hamutuk na’in-105 resin no pesoál saúde voluntária  na’in-51  ne’ebé durante ne’e sei ativa fó asistensia ba komunidade sira.

Jornalista   : Vitorino Lopes da Costa

Editór         : Florencio Miranda Ximenes

iklan
iklan

Leave a Reply

iklan
error: Content is protected !!