iklan

HEADLINE, POLÍTIKA

PR Horta kondekora Adjunta Suzanne Wilson ho medalla ordem Timor-Leste

PR Horta kondekora Adjunta Suzanne Wilson ho medalla ordem Timor-Leste

Prezidente Repúblika, José Ramos-Horta. Imajen/Tatoli Egas Cristóvão

DILI, 10 juñu 2024 (TATOLI)-  Prezidente Repúblika, José Ramos Horta, segunda ne’e, iha Palásiu Prezidensiál Bairru-Pité-Dili, kondekora medalla ordem Timor-Leste ba Adjunta Embaixadora Austrália nian, Suzanne Wilson-Uilelea, hodi rekoñese ninia servisu dedikadu no kontribuisaun boot hodi hametin parseria bilaterál entre Timor-Leste no Austrália.

Iha diskursu,  Ramos Horta, agradese Wilson-Uilelea nia dezempeñu ezemplar, dedikasaun no profisionalizmu hodi promove interese Timor-Leste nian iha nia knaar nu’udar Adjunta Xefe Misaun iha Embaixada Australia iha Timor-Leste dezde tinan 2021.

“Wilson-Uilelea nia esforsu sira fó benefísiu boot ba Timor-oan barak iha tinan hirak-ne’e nia laran, no nia merese tebes atu hetan rekoñesimentu husi ita-nia nasaun,” Horta tenik.

Xefe Estadu dehan tan, “Nia servisu sira iha kontestu relasaun estadu-ba-estadu nian sai fundamentál tebes atu promove amizade entre ita-nia povu no apoia Timor-Leste nia pás, estabilidade no dezenvolvimentu”.

Prezidente Ramos Horta afirma fila-fali Timor-Leste nia agradesimentu boot ba Australia nia amizade no asisténsia ne’ebé metin hanesan parseiru boot liu ba dezenvolvimentu no seguransa nasaun nian dezde independénsia iha 2002.

Prezidente hatudu nia konfiansa katak viziñu rua ne’ebé besik sei kontinua habelar sira-nia parseria produtivu iha interese oioin ne’ebé fahe ba malu iha tinan hirak oin mai.

Suzanne Wilson-Uilelea nu’udar diplomata iha nia karreira ida-ne’ebé iha esperiénsia liu tinan 25 hodi serbí iha servisu estranjeiru Australia nian. Nia hahu iha Departamentu Negósius Estranjeirus no Komérsiu nu’udar ofisiál jerál iha 1996.

Suzanne asumi ona kargu oi-oin iha rejiaun Pasífiku sira, servi nu’udar Sekretária Apia da-3 , Xefe Gabinete iha Ilha Thursday, Adjunta Xefe Misaun no Konselleiru Polítiku iha Suva, Adjunta Xefe Misaun no Konselleiru Dezenvolvimentu nian iha Nauru, no ikus-liu, nu’udar Adjunta Embaixadora iha Embaixada Australia nian iha Timor-Leste, pozisaun ida-ne’ebé nia hala’o ho distinsaun dezde 2021.

Parseria Timor-Leste no Australia nian avansa durante Sra. Wilson-Uilelea nia mandatu. Ida ne’e inklui Australia fornese doze vasina kontra COVID-19 liu millaun $1.2, vizita alto nivel husi lideransa nasaun rua ne’e nian, apoiu ba prosesu eleisaun Timor-Leste nian, no kooperasaun ne’ebé luan iha setór dezenvolvimentu, ekonómia, seguransa, edukasaun no entre povu.

Veterana ida ne’ebe servi iha servisu estranjeiru Australia nia durante tinan 25, Wilson-Uilelea nu’udar Primeira Aboriginál/Primeira Nasoens Australia nian nomea hodi servi nu’udar Diretora ba Departamentu Negósius Estranjeirus no Gabinete Estadu Komérsiu Australia nian iha Darwin bainhira asumi kargu ne’e iha fulan Agostu.

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!