DILI, 10 juñu 2024 (TATOLI)—Traballadór timor-oan hamutuk 870 ne’ebé serbisu iha Austrália desde tinan 2012 ses ona husi sistema serbisu instaladu husi kooperasaun Governu liuhusi Sekretaria Estadu Formasaun Profisionál no Empregu (SEFOPE) no Governu Austrália.
“Kauza traballadór sira kontinua nafatin ses husi sistema tanba sira influénsia malu hanoin sira, katak bainhira filafali mai ne’e la hetan ona oportunidade atu bá fali,” Diretór Nasionál Empregu Estranjeiru interinu husi SEFOPE, Alarico Fernandes, hateten, bainhira despede traballadór hamutuk 50 ne’ebé atu bá serbisu iha Austrália, iha Otél Garden Beach, Praia dos Coqueiros, segunda ne’e.
Haree ba situasaun traballadór ne’ebé kontinua sai husi sistema, Diretór husu ba traballadór foun sira, liu-liu sira na’in-50 ne’ebé ohin hetan oportunidade atu bá serbisu, atu respeita regra sira ne’ebé iha, liu-liu labele ses husi sistema.
“Tanba imi-nia maluk sira-ne’ebé ses husi sistema daudaun balun hakarak filafali mai sistema, maibé sistema la simu ona. Ita kontinua esforsu atu enkoraja traballadór sira-ne’ebé bá serbisu iha Austrália tenke iha sistema laran, nune’e seguru no bá serbisu iha ema-nia rai hatudu disiplina, tenke tau a’as dingindade nasaun hodi empregadór sira seluk kontinua fó oportunidade ba maluk sira-ne’ebé daudaun hein hela,” nia akresenta.
Notísia relevante : SEFOPE finaliza teste ba kandidatu traballadór Austrália 8.337 iha munisípiu Dili
Iha fatin hanesan, Diretór Jerál Serbisu Korporativu no Diretór Nasionál Formasaun Empregu husi SEFOPE, Nelson Soares Carvalho, husu ba traballadór sira-ne’ebé hetan ona oportunidade bá serbisu iha Austrália tenke hatudu atitude di’ak no labele lori arte-marsiál no rituál nia naran, maibé lori nasaun nia naran no tenke tau a’as dignidade nasaun.
“Ita hotu hatene situasaun balun foin lalais virál iha rede sosiál, hanesan timor-oan ho timor-oan asalta malu iha Santuáriu Fátima Portugal. Ida-ne’e hahalok ne’ebé hamonu diginidade nasaun no líder nasaun, nune’e husu imi hotu bainhira bá serbisu tenke kuidadu-an labele haree malu ba rasa no kor maibé ida de’it mesak timor-oan,” nia fó hanoin.
Nune’e mós, traballadór Merlina da Costa Belo, kontente tanba bele hetan oportunidade di’ak.
“Ha’u kontente tebes bele hetan oportunidade bá Serbisu iha Austrália tanba oportunidade ne’ebé ha’u hetan ne’e agora ba dala-tolu ona, ne’ebé hatudu katak grasa Maromak nian liuhusi empregadór fó nafatin oportunidade ba ha’u, no ha’u sei kumpre regra hotu ne’ebé iha atu la ses husi sistema,” nia tenik.
Liuhusi oportunidade dala-rua ne’ebé nia hetan, daudaun konsege halo negósiu loke kios no sosa rai hodi halo uma.
SEFOPE konsege haruka ona traballadór hamutuk 1.600-resin bá Austrália, hahú husi janeiru to’o juñu 2024.
Jornalista : Arminda Fonseca
Editora : Julia Chatarina
