Top

Xefe Estadu husu Embaixadór Lizualdo hametin kooperasaun ho Malázia

Prezidente Repúblika, José Ramos Horta. Imajen Tatoli/Egas Cristóvão.

DILI, 10 juñu 2024 (TATOLI) – Embaixadór foun Timor-Leste nian ba Malázia, Lizualdo Gaspar, segunda ne’e, hasoru malu ho Prezidente Repúblika, José Ramos Horta, iha Palásiu Prezidensiál Bairru-Pité-Dili hodi simu orientasaun servisu molok dezloka ba hala’o misaun diplomata iha Malázia.

“Hasoru malu ho Prezidente Repúblika hanesan mai simu orientasaun antes ha’u dezloka ba Malázia hodi hala’o knaar hanesan Embaixador Timor-Leste nian iha ne’ebá, iha orientasaun ne’e Xefe Estadu husu atu hala’o servisu ne’ebé di’ak hodi reprezenta Timor-Leste iha Malázia no hametin kooperasaun billaterál,” Embaxadór Lizualdo katak ba jornalista hafoin enkontru termina.

Nia dehan, sei kumpri orientasaun hotu ne’ebé Prezidente Repúblika haraik tanba Malázia nasaun ne’ebé amigu di’ak tebes ho Timor-Leste no sempre apoiu Timor-Leste iha área oioin.

“Malázia nasaun ida ne’e antes ne’e fó apoiu mai ita maka’as tebes, bainhira ita restaura ita nia independensia iha 2002, 2003 Malazia hahú ona fó apoiu mai ita, iha área militar hanesan fó kilat balu mai ita, ajuda kareta militar nian no seluk tan,” nia tenik.

Dadaun ne’e, Timor-Leste halo ona kooperasaun iha área oioin ho Malázia hanesan edukasaun, saúde, trasnporte komunikasaun no seluk tan.

“Ha’u sei kontinua de’it servisu saida mak Embaxadór sesante halo ona, liuliu kontinua hametin kooperasaun sira iha área edukasaun, saúde, transporte no komunikasaun. Iha transporte nian oinsa atu esforsu voo husi Malázia bele liga direita mai Timor-Leste ho permanente, ida ne’e mak ha’u sei esforsu maka’as no hametin liutan ita nia relasaun di’ak ho Malázia,” nia konklui.

Jornalista: Hortencio Sanchez

Editór: Florencio Miranda Ximenes

Publisidade

Leave a Reply

Latest Post

error: Content is protected !!