VIQUEQUE, 11 juñu 2024 (TATOLI)-Iha tersa maizumenus tuku 06:00,madrugada, ahi-han mutuk uma armazein hare no batar iha aldeia Macalosso, suku Maluru, postu administrativu Viqueque Vila, munisípiu Viqueque.
Xefe suku Maluru, Bendito Soares, informa ho akontesementu ne’e halo vítima João Kafolomau, la konsege salva nia sasan uma laran no hahan hanesan hare no batar sira.
“Ami ba haree hodi halo identifikasaun maibé ninia kauza loos ahi-han ne’e ami la hetan. Ha’u husu tuir vítima keta serkuitu eletrisidade ka imi (vítima) hodi kalan sunu ahi ruma. Maibé vítama rasik dehan la sunu ahi no uma hanesan armazein ne’e la liga liña eletriside ba. Akontesementu ida-ne’e bele deskofina ema sunu, maibé ita la ka’er toman, nune’e presiza investigasaun”, Bendito Soares, hateten ba Agência TATOLI , iha suku Maluru, ohin.
Kazu ahi-han uma ne’e, nia dehan relata ona ba Autoridade Protesaun Sivil (APC, sigla portugés), maibé ekipa sei ba Dili, depois fila maka sira halo verifikasaun.
“Tanba ita-nia vítima ne’e ninia hahan uma laran ahi han moos, maibé to’o iha fatin akontese ne’e ami haree hetan de’it ahi suar buat ida laiha. Nune’e ami husu parte relevante apoia nesesidade bázika ruma hodi vítima aguenta sustenta ninia família uma lara”, nia afirma.
Iha fatin hanesan, Vítima, João Kafolomau, sente triste ho akontesementu ahi-han uma tanba hahan sira-ne’ebé rai iha uma laran mutuk hotu.
“Ami rai hahan ne’e besik hela ami-nia uma, maibé akontese iha madruga ami lahetene buat ruma dadersan ami hader haree ahi susar de’it. Ita labele deskonfia ema ida tanba la ka’er”, nia afirma.
Nune’e, nia husu ba APC atu fó apoia emerjensia ba sira hodi bele nesesita uma-laran.
Jornalista : Vitorino Lopes da Costa
Editór : Florêncio Miranda Ximenes
