MUNISÍPIU, SAÚDE, VIQUEQUE

Kondisaun estrada aat, Família apoia pesoál saúde hulan inan-isin rua iha Liaruka

Kondisaun estrada aat, Família apoia pesoál saúde hulan inan-isin rua iha Liaruka

Kondisaun estrada aat, Família apoia pesoál saúde hulan inan-isin rua iha Liaruka.Imajen/espesial

VIQUEQUE, 11 juñu  2024 (TATOLI)- Kondisaun estrada liga ba suku Liaruka aat, nune’e obriga família tenke apoia pesoál saúde sira hodi hulan pasiente inan-isin rua ho naran Deflita da Costa ho idade 23, husi aldeia Baha-Neo, Suku Liaruka, ba hein iha Kampung-Baru atu transporta bá iha sentru saúde postu Ossu, munisípiu Viqueque.

Kazu emerjénsia ne’e akontese iha loron domingu, loron 9 Juñu 2024, maizumenus tuku 9:00 dader,  pasiente  referida kanotak moras, nune’e família sira halo  kontaktu kedas ba pesoál saúde liuliu parteira no enfermeiru ne’ebé destaka iha postu saúde Liaruka, nune’e pesoál saúde na’in-rua konsege la’o to’o iha nia-rezidénsia hodi tau kedas soru, molok familia hulan.

“Molok família sira hulan inan isin-rua ne’e sai husi Baha-Neo sira telefone ba ha’u hodi hato’o hela informasaun sira-ne’e no ha’u kontaktu ba  ambulánsia husi Viqueque ninian, maibé momentu ne’e ambulánsia lori hela moras bá Ospitál Referénsia Baucau, hafoin fila husi Baucau ha’u orienta kedas ambulánsia  bá Baha-Neo, maibé karreta labele to’o iha Baha-Neo tanba estrada aat. Nune’e  karreta to’o   Kampu-Baru hodi hein família sira hulan mai mak  ambulánsia trasporta mai iha sentru saúde Ossu,” Xefe Sentru Saude, Elsa Esperansa Monteiro, hateten ba Agência TATOLI,I.P, tersa ne’e.

Bainhira to’o iha sentru Ossu médiku, infermeiru no parteira sira halo kedas ezaminasaun ba inan no bebé tanba   inan isin-rua ne’e tuir hela imunizasaun, hafoin ne’e transfere kedan ba Ospitál Referénsia Eduardo Ximenes Baucau.

Tanba ne’e, Xefe Departamentu ne’e rejeita informasaun ne’ebe espalla iha media sosiál katak pesoál saúde sira la tau matan ba nia.

“Kazu emerjénsia inan isin-rua ne’e ami konsege ajuda to’o iha sentru  aúde no fó atendementu hafoin halo tranferénsia bá ospitál Referensia Baucau  hodi partu ne’ebá. Maske ami halo meiu hotu, maibé kondisaun estrada mak aat hodi difikulta movimentu transporte,” nia esplika.

Xefe Sentru saúde ne’e agradese ba família ne’ebé disponivél no koopera ho saúde hodi lorin inan isin-rua to’o iha dalan ne’ebé karreta asesu ba.

Ho kondisaun estrada ne’e, nia husu ba Ministériu relevante atu tau matan ba kondisaun estrada ne’e hodi fasilita servisu saúde liuliu fó atendementu ba saude ba komunidade sira iha área remota.

“Ha’u husu Governu liuliu ministériu relevante sira presiza hadi’a lalais dalan sira-ne’e, atu profisionál saúde sira bele hala’o kna’ar no fó atendimentu ba kazu emerjénsia hanesan inan isin-rua sira-ne’e ho lalais no sedu ida-ne’e maka ita-nia hakarak,” nia sujere.

Iha fatin ketak, Pesoal Saúde destakadu postu saúde Liaruka, Parteira Alda Pinto da Silva, hateten, konsege akompaña inan isin-rua husi suku Liaruka ba sentru saúde, maibé kondisaun dalan mak grave difikulta ba kareta sira asesu  tanba ne’e maka família sira apoiA saúde hulan pasiente inan isin-rua ne’e.

“Ita kondisaun dalan ne’e maka sai hanesan difikulta ba ami saúde, ami esforsu fo atendementu sedu ba ita-nia pasiente sira, maibé kondisaun mak difikulta ba ami. Dala ruma ami tenke la’o ain husi postu maka to’o iha suku ho distánsia ne’ebé dook, ami sempre to’o ne’ebá dezafiu sira-ne’e mak ami enfrenta, governu presiza atensaun ba kondiasuan dalan sira-ne’e atu ami bele asesu”. Tenik nia.

Jornalista   : Vitorino Lopes da Costa

Editór         : Florencio Miranda Ximenes

iklan
iklan

Leave a Reply

iklan
error: Content is protected !!