iklan

EDUKASAUN, HEADLINE

ME presiza hadi’a pontu balun ba implementasaun uniforme eskolár

ME presiza hadi’a pontu balun ba implementasaun uniforme eskolár

Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Domingos Lopes Lemos. Imajen Tatoli/Francisco Sony

DILI, 11 juñu 2024 (TATOLI)—Ministériu Edukasaun (ME) daudaun ne’e iha faze hadi’a pontu balun husi diploma ministeriál hodi implementa uniforme eskolár.

“Presiza duni hadi’a pontu balun, hanesan nia modelu inklui kór sira ne’e hotu, ita tenke hadi’a buat sira ne’e hotu. Grasa à Deus ida-ne’e mak bele pasa ba faze daruak nia finaliza ona esbosu ida-ne’e, signifika ba faze tuir mai ita implementa ona,” Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Lopes Lemos, informa, iha ninia knaar fatin, Vila Verde, tersa ne’e.

Esbosu ne’e submete ona ba Prezidénsia Konsellu Ministru (PCM, sigla portugés) maibé seidauk hetan desizaun finál.

“Iha fulan kotuk liubá, esbosu ne’e ita arranka ona ba PCM, maibé seidauk hetan aprovasaun no haruka mai fali ona iha ME. Iha loron 20 juñu ne’e ita sei aprezenta ba Ministra atu hetan aprovasaun para ita avansa ba faze segundu tuir mai,” nia akresenta.

Notísia relevante : Diretór Eskola 28 Novembru husu ME aselera define modelu uniforme eskolár

Iha fatin ketak, Diretór Ensinu Sekundária Tékniku Vokasionál Indústria no Teknolojia (ESTVIT) 28 Novembru iha Becora, Manuel Amaral, husu ba ME atu aselera define modelu uniforme eskolár tanba to’o agora estudante tinan letivu foun laiha uniforme eskolár.

“Ita seidauk prodús uniforme eskolár to’o agora tanba desizaun husi Ministériu Edukasaun katak labele prodús ka haruka estudante sira suku farda foun hodi hein desizaun foun husi Governu ba modelu farda ida de’it ba eskola sira iha territóriu tomak. Tanba ne’e mak la haruka estudante foun sira suku farda. Kleur loos ona, entaun ita husu ba Ministériu Edukasaun atu aselera lalais ona tanba estudante foun sira to’o agora laiha uniforme,” nia tenik.

Nia konsidera ME foti desizaun tarde ba uniforme nune’e eskola sira la uniforme, nune’e bele halo profesór sira susar identifika estudante sira bainhira iha problema ruma.

Aleinde ne’e, eskola sira ezije atu aselera uniforme eskolár tanba atu tama ona ba períodu daruak maibé estudante foun sira mai ho farda anteriór sira.

“Ita hein desizaun husi Ministériu Edukasaun mak foin bele implementa, maibé to’o agora ita hein no tama ona ba períodu daruak ona mós ita-nia oan sira nafatin mai ho farda husi eskola anteriór nia, uza faru mutin, entaun sira ketak loos ho estudante tuan sira-ne’ebé iha nanis ona farda molok Ministériu Edukasaun hasai sirkulár,” Diretór dehan.

Jornalista     : Osória Marques

Editora          : Julia Chatarina

iklan
iklan

Leave a Reply

iklan
error: Content is protected !!