Deputada membru komisaun F husu MS aumenta ambulánsia ba sentru saúde sira
DILI, 12 juñu 2024 (TATOLI)—Deputada membru Komisaun F ne’ebé trata asuntu Saúde, Seguransa Sosiál no Igualidade Jéneru iha Parlamentu Nasionál (PN), Maria Teresa Gusmão, husu Ministériu Saúde (MS) atu aumenta ambulánsia ba sentru saúde, ospitál rejionál no referál.
Nia hateten, hanesan membru komisaun F bainhira halo fiskalizasaun iha terrenu ne’e, observa katak kuaze postu saúde, sentru saúde no ospitál referál sira-ne’e ambulánsia barak mak kondisaun aat.
“Iha sentru saúde sira dalaruma hetan ambulánsia ida maibé ambulánsia multifunsaun fali dalaruma uza ba tula pasiente, maibé dalaruma mós uza serbisu mai tula ai-moruk no uza ba administrasaun balun mós. Ida-ne’e ita-nia situasaun preokupa tebe. Dalaruma pasiente mate no hetan atakasaun, tanba ambulánsia laiha iha sentru saúde, halo moras grave bele mate iha dalan bainhira labele lori lalais ba iha ospitál ka sentru saúde. Sujere Ministériu Saúde sosa tan ambulánsia,” Deputada membru komisaun F ne’e hateten ba Agência Tatoli iha resintu Parlamentu Nasionál, kuarta ne’e.
Nia dehan, ida-ne’e mak realidade ne’ebé Timor-Leste hasoru, tanba ne’e sujere ba Ministériu Saúde atu sosa tan ambulánsia foun hodi bele fasilita sentru saúde hotu iha Timor-Leste.
Ba ambulánsia ne’ebé kondisaun aat, nia husu, se bele hadi’a no halo manutensaun hodi bele fasilita populasaun sira-ne’ebé presiza tebes bainhira iha tempu emerjénsia.
Tan ne’e, tuir nia, ministériu saúde presiza haree kada prioridade liuliu ba asuntu emerjénsia liga ba pasiente sira-nia moris, tanba sira presiza atendimentu ho lalais liuhusu atendimentu ambulánsia bae ma hotu.
Deputada husi bankada Governu ne’e hateten, tinan ne’e ministériu tau ona iha Orsamentu Jerál Estadu (OJE) 2024 hodi sosa ambulánsia, maibé ladún lembra sosa tan ambulánsia hira.
Maibé, tuir nia, atu responde preokupasaun ne’ebé iha mak ministériu presiza iha orsamentu retifikativu mai urjente tebes atu tau tan orsamentu hodi sosa tan ambulánsia hodi kobre nesesidade sira-ne’ebé iha hodi haree kada prioridade.
Deputadu FRETILIN, Antoninho Doutel Sarmento, preokupa ho akontesimentu ida iha suku Liaruca, postu administrative Ossú, munisípiu Viqueque, ne’ebé komunidade lori hulan de’it inan isin-rua ida husi suku mai iha ospitál Ossú Villa.
“Kestaun ne’e ita levanta, ambulánsia mak laiha ka mina mak laiha, atu ajuda transporta ita-nia inan isin-rua lori mai iha ospitál,” nia dehan.
Vise Ministru ba asuntu Parlamentár Adérito Hugo da Costa, rejista preokupasaun kona-ba ambulánsia ne’e no sei envia ba ministériu tutela.
Jornalista : Nelson de Sousa
Editór : Cancio Ximenes
