iklan

JUSTISA, HEADLINE

Governu propoin Rui Pereira dos Santos ba asume kargu Komisáriu CAC

Governu propoin Rui Pereira dos Santos ba asume kargu Komisáriu CAC

Vise-Primeiru-Ministru no Ministru Koordenadór Asuntu Ekonómiku, Francisco Kalbuadi Lay, prezide reuniaun Konsellu Ministru, iha Palásiu Governu, kuarta (12/06/2024). Imajen Tatoli/Francisco Sony

DILI, 12 juñu 2024 (TATOLI) – Governu liuhusi reuniaun Konsellu Ministru (KM), kuarta ne’e,  iha Palásiu Governu Dili, delibera hodi propoin ba Parlamentu Nasionál (PN) atu nomeia Rui Pereira dos Santos ba Komisáriu Komisaun Anti Korupsaun (CAC) ba mandatu tinan-haat.

“Konsellu Ministru delibera no  propoin ba Parlamentu Nasionál hodi nomeia  Rui Pereira dos Santos, hanesan Komisáriu Komisaun Anti Korrupsaun, ba mandatu tinan haat,” tenik iha nota ne’ebé Agência TATOLI asesu husi media Gabinete Primeiru-Ministru.

Governu propoin naran ne’e ba Parlamentu Nasionál tanba fatin ne’e mamuk kle’ur ona, durante halo mudansa ba segunda alterasaun lei KAK.

Rekorda fali katak, Parlamentu Nasionál, iha sesaun plenária ordinária loron 22 fulan-abril tinan 2024, aprova alterasaun daruak ba Lei n. 8/2019, loron 15 fulan-jullu, Lei kona-ba Komisaun Anti-Korrupsaun ho votu afavór 37 no laiha vota kontra ka abstensaun.

Durante sesaun plenária, Ministru Justisa Sérgio de Jesus Fernandes da Costa Hornai, no Vice-Ministru Asuntus Parlamentares, Adérito Hugo da Costa, fó enkuadramentu jerál ida kona-ba objetivu prinsipál sira hosi Proposta Lei no hatán ba duvida no kestaun sira husi membrus   Parlamentu Nasionál.

Ho alterasaun ida-ne’e, ne’ebé aprova husi Konsellu Ministru iha reuniaun loron 27 fulan-marsu tinan 2024 no agora aprova husi Parlamentu Nasionál, nune’e sei reformula prosesu eleisaun no ezonerasaun ba Komisáriu Komisaun Anti-Korrupsaun atu hakat-liu difikuldade sira ne’ebé mai hosi kuorum deliberativu reforsadu.

Ho lejizlasaun foun ne’e, Komisáriu bele eleje ka ezonera ho maioria absoluta husi deputadu sira iha Parlamentu Nasionál, hodi elimina ezijénsia sira uluk nian pelumenus katoluk haat husi Deputadu sira ne’ebé marka prezensa no hala’o hela funsaun.

Medida ida-ne’e ho objetivu atu halais prosesu eleitorál no asegura funsionamentu órgaun polisia kriminál nian ne’ebé espesializadu iha kombate korrupsaun ho efikásia.

Diploma ne’e determina mós katak Komisáriu ne’ebé ninia mandatu remata ona kontinua hala’o nia knaar to’o titular foun simu pose, nune’e bele garante kontinuidade servisu públiku no atinje misaun ne’ebé sai hanesan objetivu hodi kria Komisaun Anti-Korrupsaun.

Lei ba segunda alterasaun ne’e mós hetan ona aprovasaun husi Prezidente Repúblika iha fulan kotuk.

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!