iklan

EKONOMIA, HEADLINE

SERVE, I.P hahú funsiona normál

SERVE, I.P hahú funsiona normál

Logotipu SERVE, I.P. Imajen/Espesiál

DILI, 12 juñu 2024 (TATOLI) – Servisu Rejistu no Verifikasaun Emprezariál, Institutu Públiku Fausto Soares Dias, afirma SERVE,I.P iha nasionál no sukursál sira munisípiu funsiona tanba rekursu umanu sufisiente ona atu atende kliente sira ne’ebe rejistu ba atividade ekonómika.

“Ita hotu hatene katak iha loron 3 juñu, ha’u simu pose hanesan diretór foun SERVE, I.P no iha loron 4 juñu ita halo enkontru ho funsionáriu sira hamutuk 229 depois ida-ne’e ita halo kedas notifikasaun ba funsionáriu sira atu halo anulasaun ba kontratu ne’ebé mak diretór sesante halo ba sira tinan lima, entaun ita mai ho estrutura foun anula tiha kontratu tinan lima ne’e ba fulan neen, konta hosi ida-ne’e to’o dezembru, depois mak ita haree fila fali ba tinan oin nian, entaun sira hahú servisu no ita-nia atividade funsiona ona iha nasionál to’o munisípiu”, Fausto Soares Dias informa ba TATOLI iha nia kna’ar fatin, ohin.

Nia haktuir, pesoál tékniku sira iha kada sukursál hamutuk ho koordenadór na’in neen, entaun ida-ne’e garante ona rejistu ba atividade ekonomia la’o ho di’ak.

“Ita-nia sukursál sira ne’e hamutuk ho koordenadór iha na’in neen ou hitu, entaun ita bele dehan garante ona atu atende ita-nia kliente sira ho fasil liu, tanba ita-nia funsionáriu sira simu kliente ho di’ak nune’e sira investe ekonomia iha ita-nia rain”, nia subliña.

“Hahú horseik ita simu ona kliente sira hosi nasionál to’o munisípiu tanba durante ne’e ita hotu hatene atividade SERVE nian ladún la’o másimu tanba rekursu umanus menus, maibé agora ita la’o daudaun ona ho funsionáriu ne’ebé mak ita iha”, nia dehan.

Tanba ne’e mak dezafiu sira ne’ebé iha hanesan, diretór mai atu hadia nune’e ba oin atividade ekonomia bele  la’o ho di’ak.

“Dezafiu sira ne’ebé mak antes iha, ita mai atu hadia nune’e tinan oin ita mós sei tau sukursál iha Atauro nune’e komunidade sira bele rejistu atividade ekonomia iha ne’eba, nune’e labele mai iha nasionál”, nia konklui.

Jornalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!