iklan

NASIONÁL, INTERNASIONÁL, DILI, HEADLINE, POLÍTIKA

Timor-Leste ho Nova Zelándia iha kompromisu apoia ONU hodi garante pás no estabilidade

Timor-Leste ho Nova Zelándia iha kompromisu apoia ONU hodi garante pás no estabilidade

DILI, 12 juñu 2024 (TATOLI)- Prezidente Repúblika, José Ramos-Horta hala’o sorumutuk ho Vise-Primeiru-Ministru Nova Zelândia no Ministru Negósiu Estranjeiru, Winston Peters, iha Palásiu Prezidensiál Nicolau Lobato. Ida ne’e nu’udar vizita dahuluk husi Vise-Primeiru-Ministru Nova Zelândia nian mai Timor-Leste.

Parte rua diskute kona-ba asuntu rejionál no globál oioin. Sira subliña nesesidade ba restaurasaun demokrasia iha Myanmar  mós reitera sira-nia kompromisu komun no respeitu ba direitu internasionál, liuliu ba Konvensaun Nasoins Unidas nian kona-ba Lei ba Tasi (UNCLOS) relasiona ho Tasi Xina Súl.

Kona-ba konflitu Izrael-Hamas, Prezidente Ramos-Horta no Vise-Primeiru-Ministru Peters hamutuk apela atu hetan cessar-fogu imediatu no la iha impaktu, asesu ba asisténsia umanitária ne’ebé la iha restrisaun. Sira hato’o preokupasaun maka’as kona-ba funu agresaun ilegál no la razoavel husi Rússia hasoru Ukrâinia. Sira reforsa sira-nia apoiu ba pás ida-ne’ebé komprensivu, justu no sustentavel iha rai-Ukrâinia tuir magna karta ONU nian.

Durante sorumutuk ne’e, Prezidente no Vise-Primeiru-Ministru reitera kompromisu kle’an Timor-Leste no Nova Zelândia nian atu hametin no habelar relasaun bilaterál sira, no mós serbisu hamutuk hodi apoia kooperasaun globál no hametin instituisaun multilaterál sira, inklui reforma pratika no konstrutiva Konsellu Seguransa Nasoins Unidas nian.

Timor-Leste no Nova Zelândia fó apoiu ba Konsellu Seguransa ida-ne’ebé reprezentativu liu tan ne’ebé hetan respeitu husi membru ONU nian tomak, no iha ne’ebé membru Permanente sira ezerse sira-nia responsabilidade ba benefísiu pás no seguransa internasionál nian.

“Nu’udar estadu ki’ik, ita-nia forsa mak iha unidade no kompromisu ida-ne’ebé ita partilla hodi garantia katak ita-nia instituisaun multilaterál sira reprezenta liután, nune’e mós ita-nia forsa atu apoia pás global”, afirma Prezidente Ramos-Horta

Xefe Estadu dehan: “Ita hatudu dala barak katak estadu ki’ik sira hanesan ita bele hala’o papél ida-ne’ebé folin-boot hodi ajuda rezolve dezafiu koletivu sira ne’ebé komunidade internasionál hasoru, inklui asuntu pás no seguransa sira” dehan Vise-Primeiru-Ministru Peters.

Timor-Leste no Nova Zelândia mós kontinua kontra maka’as ho uzu direitu veta. Ba Nasoins Unidas atu mantein ninia relevansia, no asegura katak nia reprezenta duni ninia membru sira-nia tomak – inklui nasaun ki’ik sira, hanesan Timor-Leste no Nova Zelândia – direitu veta ne’e devia labele utiliza.

Timor-Leste no Nova Zelândia sei kontinua servisu hamutuk hodi apoia instituisaun multilaterál ne’ebé efetivu ne’ebé adekuadu ba objetivu no suporta ita-nia nesesidade globál sira.

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!