iklan

NASIONÁL, INTERNASIONÁL, DILI, HEADLINE, POLÍTIKA

Xefe Estadu husu MNEK kuidadu foti desizaun kona-bá polítika globál

Xefe Estadu husu MNEK kuidadu foti desizaun kona-bá polítika globál

Prezidente Repúblika, J. Ramos-Horta, Hala'o enkontru ho Ministru Negósius Estranjeirus no Kooperasaun Bendito dos Santos Freitas. iha Palásiu Prezidensiál, Bairru-Pité, kuarta (12/06). Imajen Tatoli/Egas Cristóvão

DILI, 12 juñu 2024 (TATOLI) – Ministru Negósiu Estranjeiru no Kooperasaun (MNEK), Bendito Freitas, hasoru malu ho Prezidente Repúblika hodi rona orientasaun kona-ba polítika globál ne’ebé dadaun ne’e la’o hela, nune’e Governu liuliu MNEK kuidadu atu halo deklarasaun ruma no foti desizaun ruma liuliu iha Organizasaun Nasaun Unida (ONU) no reuniaun nivél aas sira iha internasionál.

“Prezidente Repúblika orienta ami atu haree reflete kona-ba situasaun globál liuliu deklarasaun Timor-Leste nian ba polítika globál liuliu kona-ba kestaun sira hanesan Myanmar, Ukrania, Russia no Gaza Palestina,” Ministru Bendito hatete ba jornalista sira iha Palásiu Prezidensiál Dili, kuarta ne’e.

Prezidente Repúblika mós fó hanoin, Timor-Leste iha lian ida de’it kona-ba polítika Estadu nian ba polítika globál ne’ebé daudaun ne’e akontese.

“Prezidente hanesan ita nia Xefe Estadu ne’ebé iha fundamentu prinsipál ba polítika esterna nian sempre fó apoiu nafatin ba kestaun internasionál sira,” nia tenik.

Iha ámbitu hasoru malu ne’e,  MNEK relata mós progresu servisu durante ne’e ba Xefe Estadu.

“Ami mós aprezenta ba Prezidente Repúblika kona-ba servisu MNEK nian durante ne’e, hanesan materia, substansia ne’ebé ligadu liu ba kooperasaun internasionál. Ami mós ko’alia kona-ba ita nia preparativu ita nia nasaun ne’ebé atu simu ita nia Embaxadór sira foun atu mai halao misaun iha Timor-Lestehanesan India, Inglaterra, Angola. Haree mós pozisaun ita nian oinsa mak koloka ita nia Embaxadór sira atu ba hala’o misaun iha liur,” nia katak.

Alende ne’e, ko’alia mós kona-ba preparasaun ne’ebé MNEK halo iha fulan kotuk to’o ohin loron kona-ba Prezidente Repúblika nia vizita Estadu ba Maputo Moçambique no Luanda Angola ne’ebé sei akontese iha fulan oin.

“Ami ho prezidente ko’alia mós kona-ba ami nia preparasaun ba Prezidente Repúblika nia viajen ne’ebé sei hala’o ba Maputu Moçambique nune’e liu kedan ba Abgola Luanda. Durante vizita Prezidente nian atu ko’alia asuntu prinsipál lubuk ida liuliu kona-ba hametin ita nia kooperasaun no asuntu importante seluk tan,” nia konklui.

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!