COVALIMA, 13 Juñu 2024 (TATOLI) – Xefe Unidade Eletrisidade Timor-Leste, Empreza Públika (EDTL, E.P), Anorito Mendonça, informa abitante iha aldeia 11 iha postu Zumalai no Suai, munisípiu Covalima, seidauk asesu ba liña eletrisidade.
“Bazeia ba levantamentu dadus ba komunidade ne’ebé asesu ona liña eletrisidade no seidauk nia rezultadu hatudu maoria asesu ona, maibé falta aldeia 11 mak la asesu”, Anorito Mendonça dehan, ohin.
Populasaun iha aldeia 11 ne’e husi postu Zumalai iha aldeia lima no Suai neen. Tanba ne’e, xefe EDTL, E.P Covalima promete iha nia mandatu sei esforsu hodi buka meiu atu komunidade iha aldeia 138, suku 30 no postu hitu tenke 100% asesu ba eletrisidade.
Iha sorin seluk, administradór postu Zumalai, Alípio Magno, klarifika katak populasaun iha suku Fatuleto iha aldeia Biata, Tietama, Suku Lour, iha aldeia Somo-Kanua no Pelet, no iha suku Raimea, iha aldeia Oebaba iha bairru SP 1 no SP 2 mak la asesu ba liña eletrisidade.
“Daudaun ne’e, sira uza de’it lampu tradisionál hodi hetan nia naroman iha tempu kalan”, nia dehan.
Postu Zumalai iha suku ualu mak hanesan Zulo iha nia aldeia lima, Fatuleto iha aldeia lima, Mape haat, Lour ualu, Lepo lima, Ececai rua, Tashilin haat no Raimea haat.
Jornalista: Celestina Teles
Editora: Maria Auxiliadora
