DILI, 13 juñu 2024 (TATOLI)—Sekretáriu Estadu Komunikasaun Sosiál (SEKOMS), Expedito Dias Ximenes, husu lidér bankada parlamentár atu konvida membru Governu sira atu mai esklarese kestaun balun iha Parlamentu Nasionál (PN) ne’e tenke haruka karta pedidu antes.
Nia hateten, ohin, reuniaun líder bankada ko’alia mós kona-ba komunikasaun entre Parlamentu ho Governu, nune’e nia-parte esplika kona-ba preokupasaun Deputadu sira-nian ho sira-nia preokupasaun balun kona-ba dalabarak konvite ne’ebé Parlamentu husu atu membru Governu sira mai iha audiénsia, plenária no mós iha komisaun espesializada sira, dalabarak tanba konvite mai to’o tarde ba membru Governu sira.
“Tanba ne’e, ohin, ha’u mai husu líder bankada sira bainhira atu konvida membru Governu atu mai esklarese kestaun balun iha Parlamentu Nasionál, se bele karta pedidu ida-ne’e tenke ba ho antesidénsia. Katak, aban atu mai hatán iha Parlamentu maibé karta ne’e ba kalan ou lorokraik no dadeersan tenke mai. Tanba ne’e, husu ba líder bankada sira se bele atu konvida membru Governu liuhusi Primeiru-Ministru, se bele iha antesidénsia, bele haruka loron tolu ka haat antes molok atu mai iha tempu ne’ebé Deputadu sira husu,” nia hateten ba jornalista sira hafoin partisipa reuniaun líder bankada iha sala konferénsia Parlamentu, kinta ne’e.
Karta pedidu ba iha Primeiru-Ministru (PM) no PM bele fó despaixu hodi autoriza membru Governu bele mai PN, nune’e Governu prontu nafatin mai esplika kona-ba kestaun saida de’it ne’ebé Deputadu sira foti.
Sekretária Meza Parlmanetu Nasionál (PN), Virgínia Ana Belo, hateten ida-ne’e hanesan meiu komunikasaun hodi bele fó tempu uitoan ba Governu atu iha preparasaun di’ak-liu antes mai Parlamentu Nasionál.
Hanesan akompaña iha reuniaun plenária segunda no tersa, Deputadu sira kestiona buat barak tebes iha área saúde no seluk tan dalaruma husu pedidu urjénsia hakarak rona membru Governu, maibé tuir prosedimentu Prezidente PN haruka karta ba PM hafoin PM mak autoriza ninia membru Governu sira liga ho lei sira, no sira tenke mai atende ida-ne’e. Nnune’e, PN sei muda mekanizmu uituan hodi bele fó tempu ba membru Governu sira halo preprasaun antes mai PN.
Entretantu, reuniaun líder bankada ne’e prezide direta husi Prezidente Parlamentu Nasionál, Maria Fernanda Lay, no parte Governu reprezenta husi Sekretáriu Estadu Komunikasaun Sosiál (SEKOMS) tanba Vise Ministru asuntu Parlamentár, Adérito Hugo da Costa, iha hela serbisu seluk ne’ebé hala’o iha munisípiu.
Aleinde ne’e, iha reuniaun líder bankada ko’alia mós kona-ba asuntu ratifikasaun tratadu Organizasaun Mundiál Komérsiu (OMK) ne’ebé hala’o tiha ona iha semana kotuk, no agora hein hela Governu atu apronta lei balun OMK nian ho mós lei pre-adezaun ba ASEAN, nune’e hafoin enkontru SEKOMS sei komunika ho ministériu relevante atu bele hato’o.
Jornalista : Nelson de Sousa
Editór : Cancio Ximenes
