iklan

EKONOMIA, HEADLINE

Governu kontinua promove mikro pekena no media empreza iha TL

Governu kontinua promove mikro pekena no media empreza iha TL

Ministru MKI, Filipus Nino Pereira. Imajen Tatoli/António Daciparu

DILI, 13 juñu 2024 (TATOLI) – Ministru Komérsiu no Indústria, Filipus Nino Pereira, hateten kompromete Governu promove nafatin mikro pekena no media empreza sira iha Timor-Leste (TL).

“Polítika ami nian mak nafatin promove emprendendorizmu liliu ita-nia mikro pekena no media empreza sira, tanba durante ne’e sira mak sustenta hela ita-nia ekonomia iha rai laran, entaun ita tenke mantein nafatin espiritu diversidade ekonomia sira ne’ebé mak ita iha”, Filipus Nino Pereira informa ba TATOLI iha Timor Plaza, ohin.

Nia afirma, Governu kontinua fasilita no mós fó espasu atu bele divulga sira-nia produtu sira ne’e ba oin.

“Ami hanoin hela oinsá mak estabelese plataforma foun ida kona-ba Mic In Timor-Leste, entaun  ida-ne’e espasu ida ne’ebé mak ita fó ba setór sira halo promosaun ba produtu ne’ebé mak ita prodús iha rai laran, nune’e ita bele identifika ida ne’ebé mak potensiál no sei sai hanesan baze fundamentál ida ba implementasaun polítika substituisaun importasaun, entaun produtu ne’ebé mak ita prodús iha rai laran, ita bele hasa’e kualidade no kuantidade produsaun, nune’e ita bele implementa ona kuota hodi redús produtu ne’ebé mak hanesan ita prodús iha rai laran”, nia afirma.

Nia informa, produtu ne’ebé mak Governu esporta ba rai liur mak hanesan mina nuu virjen, mina kamii no mós produtu sira seluk ne’ebé mak Timor-Leste iha.

“Ita durante ne’e esporta ona ba rai liur mak mina nuu virjen, mina kamii no mós produtu agríkula sira seluk tan ne’ebé mak ita iha, maibé importante mak ita tenke garante ninia sustentabilidade : ezemplu ohin ita Esporta, aban mós kontinua nafatin, ita tenke iha nia kontinuidade laos ita esporta de’it, depois ema husu fali ita laiha, entaun ida-ne’e mak sai preokupasuan boot ida ba ita”, nia esplika.

Tanba ne’e, nia enkoraja setór privadu sira atu bele haree potensialidade ekonomia ne’ebé mak Timor-Leste iha atu bele garante ninia kualidade no sustentabilidade ba oin.

“Ha’u enkoraja ba ita-nia setór privadu sira atu bele haree potensialidade ekonomia ne’ebé mak ita iha, atu ita bele garante ninia kualidade no sustentabilidade iha futuru”, nia konklui.

Jornalista: Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!