iklan

COVALIMA, HEADLINE

Komisaun A sensibiliza pakote Lei ba Rai ba autoridade Covalima

Komisaun A sensibiliza pakote Lei ba Rai ba autoridade Covalima

Komisaun A PN sensibiliza pakote Lei ba Rai ba autoridade Covalima. Foto/Celestina Teles.

COVALIMA, 13 Juñu 2024 (TATOLI) – Komisaun A Parlamentu Nasionál (PN) ne’ebé trata asuntu Justisa no Konstitusionál, divulga pakote Lei ba Rai ba autoridade sira iha munisípiu Covalima.

Prezidente Komisaun A, Patrocínio Fernandes, dehan Parlamentu Nasionál halo serbisu bazeia ba konstituisaun ne’ebé fó kompeténsia atu halo lei, halo fiskalizasaun ba atu governativu no hola desizaun polítika ne’ebé baibain materializa liuhusi rezolusaun ne’ebé fó sai husi Parlamentu.

“Ami mai Covalima no nia natureza fiskalizasaun ba atu sira. Iha fiskalizasaun ne’e, iha atividade oioin ita presiza atu halo, inklui rona preokupasaun husi populasaun no autoridade sira nu’udar autór implemendór no ezekutór ba lei no polítika públika. Ita hatene lei sira ne’ebé iha, iha duni nia relevánsia ho ita-nia situasaun ka realidade ka presiza halo revizaun”, Patrocínio Fernandes dehan, ohin.

Tuir Parlamentu Nasionál nia haree, gráfika problema ne’ebé populasaun sira hasoru iha territóriu aas liu mak disputa rai entre komunidade, família, no autoridade.

“Ita iha ona lei lubuk ne’ebé hatuur kona-ba asuntu rai. Ho ida-ne’e, Komisaun A hanoin katak presiza rona populasaun no autoridade lokál sira hanesan xefe suku, administradór postu, tanba sira mak besik liu komunidade”, realsa.

Pakote Lei ba Rai ne’e mak hanesan Lei númeru 1/2003, 10 Maiu, kona-ba Rejime Jurídiku Bens Imóveis no Titularidade Bens Imóveis, Lei númeru12/2005, 12 Setembru, Rejime Jurídiku Bens Imóveis segundu parte arrendamentu entre partikulár ne’ebé revoga ho Lei númeru 10/2011, kona-bá Kódigu Sivíl, Lei númeru 13/2017, 05 Maiu, sobre Rejime Espesiál Define Titularidade Bens Imóveis no Lei númeru 8/2017, 26 Abríl, kona-ba Espropriasaun Utilidade Públiku.

Aleinde ne’e, Dekretu-lei númeru 27/2011, 6 Jullu, kona-ba Regulasaun Titularidade Bens Imóveis laiha kazu disputa, Dekretu-lei númeru 5/2020, 6 Fevereiru, kona-ba Organizasaun Funsionamentu Komisaun Terra no Propriedade, Dekretu-lei númeru 14/2022, 6 Abríl, Aprovasaun Kódigu Rejistu Prediál  no Dekretu-lei númeru 65/2022, 23 Agusto, sobre Informasaun Kadastrál.

Prezidente Autoridade Covalima, Miguel Armada Cardoso, dehan divulgasaun lei husi Komisaun A atu autoridade sira bele rona informasaun kle’an no hatene mós prosesu atu hato’o keixa.

“Ho prezensa Komisaun A sosializa informasaun kona-ba pakote Lei ba Rai ne’e atu autoridade sira bele iha koñesimentu no bele hato’o sira-nia preokupasaun ne’ebé durante ne’e enfrenta”, nia salienta.

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!