iklan

EDUKASAUN, HEADLINE

ME la autoriza eskola sira loke klase parelelu

ME la autoriza eskola sira loke klase parelelu

Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Domingos Lopes Lemos. Imajen Tatoli/Francisco Sony

DILI, 13 junu 2024 (TATOL)Ministériu Edukasaun (ME) la autoriza ona eskola sira atu loke klase parelelu tanba tenke tuir prosedimentu legál.
“Ita orienta ona atu komunidade no eskola sira hahú iha tinan 2024 labele loke ona klase parelelu tanba tenke tuir prosedimentu legál. La’ós loke tiha mak runga-ranga de’it, depois mai entrega fali ba Ministériu Edukasaun, klaru ministériu labele toma medida ba asuntu ne’e tanba tuir prosedimentu legál bainhira loke eskola ida tenke tuir orientasaun ka padraun ne’ebé estabelese ona,” Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Lemos Lopes, informa iha salaun INFORDEPE, Balide, kinta ne’e.

Nia husu ba Diretór Servisu Edukasaun munisípiu no direjente eskola sira atu haree asuntu ne’e no hapara tiha klase parelelu sira ne’ebé iha.

“Tanba ida iha Ermera, diretór ida loke tiha pre-eskolár ida ho sala neen no nia rekruta tiha profesór na’in-11, depois agora nia entrega fali ba Ministériu Edukasaun atu selu rihun $36, ida ne’e problema. Nune’e mós ita sei tau atensaun ba klase parelelu sira iha Viqueque, liu-liu Uatulari no Uatucarbau, ne’e tanba iha dezentendimentu balun ne’ebé mosu iha ne’ebá,” nia akresenta.

Notísia relavante : MESSK Sei Hapara Atividade Klase Paralelu iha Munisípiu

Sekretáriu Estadu Elespera katak direjente foun sira ne’ebé iha bele rezolve asuntu hirak ne’e iha baze.

“Ministériu Edukasaun mak iha responsabilidade atubele loke klase parelelu bazeia ba nesesidade, ne’ebé direjente foun sira hamutuk ba haree situasaun sira ne’e. Ida-ne’ebé labele ita labele obriga no ida-ne’ebé dehan bele favór ida mai koordena ho Ministériu Edukasaun, nune’e Ministériu Edukasaun ba halo avaliasaun hafoin ita implementa. Ita espera katak ho direjente foun sira ne’ebé iha bele rezolve situasaun sira ne’e,” nia fó hanoin.

Diretór eskola 04 Setembru, Sergio Alfredo Da Cruz, aseita ho desizaun ME hodi hapara klase parelelu.

“Eskola ida nia klase parelelu eziste ne’e atu di’ak liu ne’e halakon tiha de’it tanba komplikadu loos, agora eskola 04 Setembru ne’e dehan nia parelelu iha Fatumeta, agora profesór sira ne’ebé hanorin iha ne’ebá ne’e mesak voluntáriu hotu de’it, entaun ne’e problema boot. Tanba klase parelelu iha Fatumeta ne’e aula ida prenxe ho estudante 12 ou balun 18 de’it. Agora ha’u mak sai diretór foun ne’ebé ha’u sei halo aprosimasaun para taka tiha,” nia tenik.

Eskola parelelu ida iha Fatumeta ne’e ho nia atributu ketak, tanba ne’e presiza halo aprosimasaun.

“Ita halo aprosimasaun de’it nune’e halakon tiha, tanba estudante sira-ne’ebá dehan eskola ne’e semi públiku ho sira-nia atributu rasik. Agora ha’u halo hela estimasaun depois ita halo oinsá para ema nia oan sira labele sai vítima bainhira ita halakon klase parelelu ne’e, tanba eskola 04 Setembru ne’e mós sala luan hela,” nia salienta.

Jornalista      : Osória Marques

Editora           : Julia Chatarina

iklan
iklan

Leave a Reply

iklan
error: Content is protected !!