iklan

EKONOMIA, HEADLINE

MKI rejista benefisiáriu ba KNI hamutuk 327 desde tinan 2021-2024

MKI rejista benefisiáriu ba KNI hamutuk 327 desde tinan 2021-2024

Ilustrasaun negósiu inovativu. Imajen/Espesiál

DILI, 13 juñu 2024 (TATOLI)—Ministériu Komérsiu no Indústria (MKI) rejista ona benefisiáriu ba Kompetisaun Negósiu Inovativu (KNI) hamutuk 327 desde tinan 2021-2024.

“Liga ho servisu Ministériu Komérsiu no Indústria kona-ba mikro, pekena, no médiu empreza la’o hahú iha tinan 2021, to’o agora ministériu halo ona programa lubuk ida hodi bele eleva benefisiáriu, populasaun, no komunidade, liu-liu empreza kiik sira hahú husi mikro ne’e oinsá mak bele hadi’a iha sira-nia moris ba médiu empreza,” Diretór Nasionál Apoiu Dezenvolvimentu Mikro Pekena, Médiu no Empreza iha MKI, Reinaldo Borges, relata ba Agência Tatoli, iha Timor Plaza, kinta ne’e.

Notísia relevante : IADE lansa kompetisaun planu negósiu inovativu ba hortikultura

MKI iha loron 05 jullu sei fó graduasaun ba empreza balun ne’ebé sira-nia negósiu hetan ona  susesu.

“Gradusaun ne’e atu hatudu ba públiku katak timoroan mós bele susesu liuhusi Kompetisaun Negósiu Inovativu. Husi empreza 327, ami foti uluk empreza 27 ne’ebé susesu sira ne’e mai husi KNI tinan 2021 no 2022 no ba tinan 2023 no 2024 nian ne’e sei muda ba 2025,” nia akresenta.

Empreza sira-ne’ebé sei hetan graduasaun ne’e iha ona negósiu iha área hanesan vera juice, restaurante, negósiu inovativu iha kafé no seluk tan.

Benefisiáriu KNI tinan 2023 no 2024 antes iha tinan 2025 hetan graduasaun, daudaun ministériu halo hela programa monitorizasaun no inspesaun ba mikro, pekena no médiu empreza.

“Molok hetan graduasaun, semana ida antes ami sei fó formasaun ba sira hodi prepara didi’ak graduasaun ba tinan 2025, formasaun ne’ebé ita fó ne’e serbisu hamutuk Institutu Apoiu ba Dezenvolvimentu  Emprezariál, Institutu Públiku (IADE, I.P) kona-ba literasia finanseira, asesu ba merkadu, no relatóriu finanseira,” nia tenik.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!