iklan

HEADLINE, MANUFAHI

MOP promete hadia ponte lima ne’ebé estragu hosi udan bo’ot iha ‘’costa sul’’

MOP promete hadia ponte lima ne’ebé estragu hosi udan bo’ot iha ‘’costa sul’’

Ministériu Obras Públiku sei hadia ponte lima ne’ebé hetan estragu husi udan bo’ot iha ‘’Costa Sul’’.

DILI, 13 juñu 2024 (TATOLI) – Ministériu Obras Públiku sei hadia ponte lima ne’ebé hetan estragu husi udan bo’ot iha ‘’Costa Sul’’.

“Ita bo’ot sira hateten foin daudaun ne’e mosu udan bo’ot iha Costa Súl iha Lautém, Manatutu, Same no Suai no husi udan ne’e halo estrada no ponte barak mak kotu no tuir dadus ne’ebé ami rejista mak hanesan iha Lautém ponte ida mak hetan estragu, iha Same ida, iha Natarbora ida no Suai iha ponte rua mak hetan estragus, agora daudaun ekipa tékniku iha ona terenu hodi halo levantamentu atu ita bele rezolve”, Ministru Obras Públiku Samuel Marcal, hateten ba jornalista sira hafoin serimónia selebrasaun kontratu ho Empreza Montana Diak ba reabilitasaun estrada Turiscai ba Maubisse ne’ebé hala’o iha Salaun Binani Administrasaun Postu Adminiatrativa Turiscai, kinta, ohin.

Nia dehan, Ministériu Obras Públiku sei la nonok ba asuntu ne’e no sei buka rezolve tanba ida-ne’e asuntu importante.

“Ami nia intervensaun imedidata ba ponte sira ne’ebé mak hetan estragu mak ami-nia ekipa tékniku sira halo hela levantamentu dadus ba asuntu ida-ne’e no kuandu ita konklui ona levantamentu ita presiza halo dezeña ba ponte sira ne’e, ita-sei haree ninian dezeñu sira ne’e ho didi’ak pois mak ita halo implementasaun, nune’e ita labele estraga ita nia osan”, nia adianta.

Governante ne’e husu ba komunidade sira atu pasiénsia hodi hein tanba ekipa ministeriál sei halo levantamentu.

“Husu ba komunidade sira hotu atu pasiénsia uitoan, ita labele halo buat hotu iha tinan ida-nee nia laran, ita-nia rekursu ita-nia kapasidade empreza sira mós menus, depois iha buat barak ita sei halo maibé halo ho neneik, halo ho kuidadu tanba ita-nia osan mós uitoan, ita laos nasaun ida riku tebes, ita halo projetu sira ne’e ho kuidadu atu ita bele uza ba tempu ne’ebé naruk”, nia konklui.

Jornalista: Natalino Costa 

Editór : Zezito Silva

iklan
iklan

Leave a Reply

iklan
error: Content is protected !!