iklan

MUNISÍPIU, SEGURANSA, VIQUEQUE

Padre Tomas de Aquino: banati tuir Santo António sai protetór ba povu no nasaun   

Padre Tomas de Aquino: banati tuir Santo António sai protetór ba povu no nasaun   

Komandu PNTL Munisípiu Viqueque ho sarani katolika selebra misa Santo António. Imajén Tatoli/Vitorino Lopes da Costa

VIQUEQUE, 13 juñu 2024 (TATOLI)- Amu Paróku Viqueuqe, Padre Tomas de Aquino, husu ba membru Polísia Nasionál Timor Leste (PNTL) iha munisípiu Viqueque atu halo kna’ar  banati tuir hahalok mahein Santo António de Lisboa hodi sai protetór ba populasaun no Estadu Timor-Leste.

“Ohin ita selebra hamutuk Santo António de Lisboa ne’ebé nu’udar mahein ba PNTL nian tanba intituisuan PNTL foti Santo ida-ne’e sai hanesan  mahein nomós sai hanesan modelu fiar na’in-nia. Husu bele banati tuir no moris tuir Santo ne’e ninia hahalok no liafuan sira hodi fó seguransa ba ema hotu-hotu moris iha pás iha dame, iha hakmatek no iha haksolok nian laran. Liu husi knaar PNTL sira-nia hodi serbí di’ak liután Maromak nian reinu, Maromak nia povu, ne’ebé Maromak fó ona ba ita”, Padre Tomas de Aquino, hateten liuhusi ómilia baihira dirije misa selebrasaun loron Santo António iha komandu PNTL munisípiu Viqueque, ohin.

Padre Paróku ne’e dehan serbisu PNTL bazeia  lema ‘kumpre lei no ordém’ liafuan rua ne’e mak sai hanesan ukun fuan husi Maromak ne’ebé hanorin ona ba nia emar sira atu hadomi na’in Maromak liu sasán hotu-hotu, hadomi ema seluk hanesan ita-nia an rasik.

Komandu PNTL Munisípiu Viqueque ho sarani katolika selebra misa Santo António. Imajén Tatoli/Vitorino Lopes da Costa

“Maske servisu sira-ne’ebé PNTL sira halo todan no susar, maibé hakarak ka lakohi ita kumpri duni ukun fuan sira hodi implementa lei no ordém, atu ema hotu moris iha hakmatek no pás. Se ita hotu-hotu Maromak nian oan, ita moris tuir loloos ukun fuan Maromak nian. Ha’u-nia hanoin ita la presiza lei barak iha ita-nia moris ho ordém sira tanba ema ida-idak la’o tuir ninia dalan”, katak Amu.

Amu haklaken tan: “Nune’e Santo no Santa sira maka sai ema nia mediadór ne’ebé iha Maromak nian futar oin, harohan nafatin hodi tau matan nafatin ba sarani sira, hanorin nafatin ba sarani sira atu oinsá sarani sira moris tuir Santo iha mundu ida-ne’e”, nia afirma.

Nune’e, Sasardote ne’e fó hanoin ba PNTL tau nafatin seguransa ba povu hodi povu bele moris hakmatek, maske servisu ne’ebé todan nafatin hatudu ho fuan hodi lori ema hotu-hotu ba moris di’ak.

Iha biban hanesan, Segundu Komadante PNTL munisípiu Viqueque, Inspitór Xefe Domingos Gomes, hateten Santo António ne’ebé durante ne’e sai mahein ba PNTL no kontinua akompaña servisu hotu hodi fó seguransa ba povu Viqueque atu moris iha pás no hakamatek nian laran.

“Liuhusi Santo António itabele husu ajuda no haraik ba nia, hodi nia tulun ita ida-idak no fó forsa no kbi’ik  ba  ami PNTL  sira-ne’ebé loron-loron hala’o ami-nia kna’ar hodi fó seguransa ba komunidade sira ho baze ba lei no ordem ho loloos serbí ba povu tomak”, nia afirma,

Tanba ne’e, Komandante ne’e agradese ba autoridade no komunidade munisípiu Viqueque ne’ebé partisipa misa selebrasaun Santo António nian.

Tuir dadús membru PNTL ne’ebé servisu ativu iha Komandu PNTL munisípiu no postu eskuadru lima totál na’in-137 ne’ebé fó seguransa iha munisípiu Viqueque.

Jornalista   : Vitorino Lopes da Costa

Editór         : Florencio Miranda Ximenes

iklan
iklan

Leave a Reply

iklan
error: Content is protected !!