iklan

HEADLINE, SAÚDE

Servisu Saúde Liquiça rejista moras IRA 9000-resin iha abríl-maiu

Servisu Saúde Liquiça rejista moras IRA 9000-resin iha abríl-maiu

infesaun vias respiratóriu aguda (IRA). Ilustrasaun/Google

DILI, 13 juñu 2024 (TATOLI)–Servisu Saúde munisípiu Liquiça, rejista moras Infesaun Voas Respiratóriu Aguda (IRA) hamutuk 9.589 iha fulan-abríl no maiu 2024.

Diretór Servisu Saúde munisípiu Liquiça, Luís M. Albino, hateten aleínde iha fulan rua ikus ne’e servisus aúde mós rejista moras sira seluk hanesan tee-been agudu 1.211, asidente tráfiku 155, Scabies 183, pneumonia 275, ulsera jenital 53, tuberkuloze 38, tee-been ran hitu (7) no dengue 10 no malária 0.

Iha primeiru trimestre [janeiru-marsu), nia relata, moras IRA hamutuk 14.434, tebeen agudu 2.100, asidente tráfiku 146, Scabies 247, pneumonia 108, ulsera jenital 76, tuberkuloze 70, tee-been raan 35 no dengue 30 no malaria 0.

“Ida-ne’ebé tuir vijilánsia nia up date iha kada semana mak IRA no tebeen mak aas hela, maibé moras sira seluk ne’e ladún barak,” Luís M. Albino hateten ba Agência Tatoli, hafoin partisipa semináriu “Stakeholder Consultive Workshop for validation of vulneravelity anda adaptation assesmente and climate and health risk profile for Timor-Leste”, durante loron tolu hodi halo validasaun ba dadus perfil risku klima no saude, relatóriu Vulnerabilidade no Avaliasaun iha munisípiu hotuhotu, iha Delta Nova.

Moras IRA ne’e iha impaktu husi buat barak, tanba ne’e mak ema hotu presiza fó atensaun hodi kuidadu aan atu evita moras ne’e.

Tuir nia, moras IRA mai hosi “Mudansa klímatika ne’e kontribui ba moras IRA liuhosi rai-rahun, problema udan laloos, entaun liuliu labarik oan sira-ne’e hetan mora IRA ho fasil.

Luís M. Albino dehan, servisu saúde mantein halo promosaun saúde ba populasaun liuhosi programa Servisu Integradu Saúde Komunitariu (SISCA), klinika movel, eskola sira no servisu vijilánsia saúde uza Toa atu halo avizu ba komunidade.

Moras Infesaun Vias Respiratória Aguda (IRA)

Moras infesaun Vias Respiratóriu Aguda (IRA) mak infesaun viral (infeksaun ne’ebé kauza hosi virus) ne’ebé akontese iha ita-nia dalan iis nian. Bainhira ita dada iis anin sei halai tuir ita-nia dalan iis nian antes to’o iha pulmaun. Normalmente ita-nia dalan iis hahú ka forma hosi Inus, Kavidade nasal (inus kuak), faringe no laringe (kanál rua ne’ebé nia lokalizasaun iha kakorok).

Anin sei pasa hosi dalan-isin hirak ne’e molok tama ba traqueia no pulmaun. Infesaun ne’ebé akontese iha ita-nia dalan-iis sei provoka ka halo ita sente susar no la konfortavél bainhira dada iis, no nu’udar konsekuénsia sei halo ita-nia isin falta anin hodi hala’o nia funsaun ho di’ak. Moras ida-ne’e fasil tebes da’et no fasil tebes atu kura.

Kauza hosi Infesaun Vias Respiratória Aguda

Moras IRA kauza hosi virus no bakteria ne’ebé invade diretamente ita-nia dalan iis liuhosi matan, inus no ibun. Virus sira-ne’ebé hamosu moras ne’e mak hanesan Rhinovirus, Coronavirus, Virus parainfluenza, no adenovirus.

Fatór sira-ne’ebé kontribui hetan moras IRA

Fatór sira-ne’ebé kontribui atu hetan moras IRA mak hanesan (1) Relasaun ho Individu; Laabarik sira-ne’ebé la simu imunizasaun, bebé ne’ebé la hetan susu hosi inan, bebé no labarik sira menór ho idade tinan ida, sistema imunolojia fraku (daya tahan tubuh lemah), má nutrisaun, moras krónika, ijiéne pesoál ne’ebé la di’ak.

Relasiona ho Ambiente mak; Mudansa temperatura ambientál, poluisaun (rai-rahun), asinamentu (kepadatan, overcrowding), falta ventilasaun iha uma, fumadór barak (su’ar hosi sigaru bele hasa’e insidénsia ba moras ne’e) no ahi-su’ar.

Transmisaun

Moras Infesaun Vias Respiratóriu Aguda (IRA) transmite ka da’et liuhosi kontaktu direta (koali’a, fani, kabeen) ho ema ne’ebé hetan tiha ona moras ne’e.

Sintóma

Moras Infesaun Vias Respiratóriu Aguda (IRA) sei hatudu sinál no sintóma hanesan; Inus been turu no suli ka inus metin, me’ar (me’ar maran), isin kolen ka baruk, isin manas (dalaruma), garganta moras, no ulun moras (dalaruma).

Tratamentu

Tratamentu ba iha moras infesaun vias respiratóriu aguda (IRA) iha oin rua (2) mak tratamentu medikamentoza (ho aimoruk) no tratamentu non-medikamentosa (la uza ai-moruk).

Tratamentu medikamentoza (ho aimoruk): médiku sira mak sei fó aimoruk bainhira ita ba hala’o konsulta iha sentru saúde ka iha ospitál. Tratamentu non-medikamentoza (tratamentu la ho ai-moruk): tratamentu ne’ebé prátiku no ita bela halo hanesan suas ho bee manas nia su’ar, hemu bee no jus barak, deskansa barak no selu-seluk tan.

Prevensaun

Moras infesaun vias respiratóriu fasil tebes atu kona ema maibé fasil tebes mós atu prevene, sé ita iha konsiénsa no kultura saudavel. Asaun ka hahalok sira-ne’ebé ita tenke halo hodi prevene moras ne’e mak hanesan; fase liman ho sabaun, hadook aan hosi ahi-su’ar no rai-rahun, taka inus no ibun bainhira fanin ka me’ar, susu-been eskluzivu ba bebé foin moris to’o fulan neen (6), labele fuma besik, halo vasinasaun, no kuidadu ijiéne pesoál.

Jornalista : Jesuína Xavier

Editór      : Cancio Ximenes

iklan
iklan

Leave a Reply

iklan
error: Content is protected !!