iklan

EDUKASAUN, HEADLINE, MUNISÍPIU, OÉ-CUSSE (RAEOA)

STAE abertura edukasaun sívika ba estudante ESG Baqui atu promove partisipasaun

STAE abertura edukasaun sívika ba estudante ESG Baqui atu promove partisipasaun

STAE abertura edukasaun sívika Iha ESG Baqui Oé-Cusse. Imajen Tatoli/Abílio Elo Nini.

OÉ-CUSSE, 12 juñu 2024 (TATOLI) – Ekipa husi Sekretariadu Tékniku Administrasaun Eleitorál (STAE), tersa ne’e, realiza edukasaun sívika tinan letivu 2024 nian iha Eskola Sekundáriu Jerál (ESG, sigla portugés) Baqui, suku Naimeko, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA).

Edukasaun eleitorál ne’e ho ho tema, hakbiit koñesimentu foinsa’e sira iha área eleitorál hodi promove partisipasaun másimu iha aktu eleitorál.

“Atividade primeiru mak STAE halo, liuliu ba iha eleitór potensiál sira, tanba sira-ne’e futuru eleitór ba nasaun, entaun sira presiza hetan formasaun kle’an natoon, nune’e liuhusi formasaun  sira-ne’ebé hetan kona-bá papél STAE, prosesu resensiamentu eleitorál no atualizasaun baze dadus,” Diretór Nasionál Koordenasaun Edukasaun no Formasaune Eleitorál Munisípiu, Eduardo Casimiro de Deus, hateten.

Tuir nia, durante realiza edukasaun sívika ne’e, introdús kona-bá lala’ok prosesu eleisaun ne’ebé iha, nune’e estudante sira bele fahe fila-fali ba família no komunidade iha bairru no aldeia sira, hodi bele hasa’e taxa partisipasaun iha eleisaun sira tuir mai.

“Tán ne’e mak alvu edukasaun ne’e ba iha primeiru eleitór sira, katak ba eleitór foun, sira-ne’ebé oras ne’e tinan 16 ona, katak iha tinan oin sira atinje ona tinan 17, entaun bele trata ona kartaun eleitorál, ba oin bele ezierse ona sira-nia direitu síviku hanesan eleitór atu partisipa iha festa demokrasia,” nia katak.

Diretora ESG Baqui, Rina RH Rampi, agradese tanba totál estudante iha ESG Baqui kuaze 600, maibé maioria idade 16 mai kraik, maibé ho prezensa STAE bele motiva oinsá asesu kartaun eleitorál.

“Ha’u sente programa ne’e di’ak, ha’u agradese tanba ami profesór no alunu, bele hetan informasaun kle’an kona-bá edukasaun eleitorál husi STAE ho CNE, estudante sira bele hetan koñesimentu ba sira nu’udar sidadaun iha Timor-Leste, tenke iha identidade tanba nu’udar jerasaun foun tenke partisipa ativa mós iha formasaun sira hanesan ne’e,” nia orgullu.

Notísia relevante: STAE Oé-Cusse rejista eleitór 9,978 la vota

Entretantu, hola parte iha edukasaun eleitorál ne’e, mai husi Komisaun Nasionál Eleisaun (CNE), Polísia Nasionál Timor-Leste (PNTL), Autoridade lokál sira no estudante kuaze 200 mai husi ESG Baqui.

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!