iklan

INTERNASIONÁL, HEADLINE, SOSIEDADE SIVĺL

Ary Bargon reprezenta Kontinente Ázia tara tais ba Papa Francisco iha Vatikanu

Ary Bargon reprezenta Kontinente Ázia tara tais ba Papa Francisco iha Vatikanu

Rivelino Gonçalves “Ary Bargon” kahe tais ba Papa Francisco iha Vatikanu. Imajen espesiál.

DILI, 14 juñu 2024 (TATOLI) — Artista Komediante Timor-Leste, Rivelino Gonçalves “Ary Bargon” reprezenta komediante sira husi Kontinente Ázia tara ona tais ba Papa Francisco hafoin partisipa enkontru hamutuk ho komediante mundiál sira seluk iha Aula Clementine, Palásiu Apostólika Vatikanu.

Sorumutu ne’ebé Papa Francisco halo ho komediante sira-ne’e realiza husi Diresaun Kultura no Edukasaun Vatikanu ho objetivu atu hametin relasaun entre komediante sira iha mundu ho Igreja Katólika, ne’ebé fó-sai direta husi Vatican News nia pájina ofisiál, tuku 08:30 dadeer, oras vatikanu nian.

Ary Bargon liuhusi nia pájina ofisiál agradese ba oportunidade murak ne’ebé Vatikanu oferese ona hodi hili hanesan reprezentante komediante la’ós de’it husi Timor-Leste maibé husi Kontinente Ázia hasoru Papa Francisco no konsege realiza iha oras 15:48.

“Obrigadu Santísima Trindade, Na’in Feto, São José ba bensa, grasa no domin hotu. Buat hotu husi Nai, Furak hotu husi Nai. No ba Nai ha’u sei nafatin atu hatudu ba ema hotu katak Nai mak halo ha’u sai nune’e. Ha’u sei kontinua obra no serbisu hotu nebe’e ha’u iha, talenta no kreatividade hotu ne’ebé mak Nai fó mai ha’u nu’udar soin ida-ne’ebé mak boot tebes,” Ary Bargon hato’o sentimentu kontente ne’e iha nia pájina ofisiál Facebok.

Sorumutu ho komediante sira-ne’e mós hodi selebra beleza no diferensa umana nian no promove mensajen dame, domin no solidariedade, ho sai hanesan momentu signifikante iha diálogu entre kultura no fahe haksolok ho esperansa.

Liuhusi publikasaunn Vatican News iha 08 juñu, konfirmadu ona komediante 105 husi nasaun 15 mak konfirmadu partisipa iha sorumutu refere. Marioria komediante ne’ebé partisipa mai husi nasaun Itália no husi kontinente Ázia reprezenta husi Timor-Leste, komediante Ary Bargon.

Ary Bargon mós hola parte hamutuk ho komediante famozu sira husi Amérika hanesan Stephen Colbert, Jimmy Fallon, Chris Rock, Conan O’ Brien no nasaun seluk tan.

Komediante husi nasaun 15 ne’ebé hasoru ona Papa Francisco komposta husi Arjentina ida (1), Brazíl rua (2), Kolómbia tolu (3), Fransa tolu (3), Alemaña lima (5), Irlandia tolu (3), Itália (67), Méksiko rua (2), Polónia ida (1), Portugál tolu (3), Reinu Unidu ida (1), España haat (4), Estadu Unida Amérika ualu (8), Suiça (1) no Timor Leste (1) mak reprezenta nasaun sira husi Ázia.

Rivelino Gonçalves “Ary Bargon” hala’o viajen husi Dili, Timor-Leste ba Roma, Itália iha loron 11 fulan-juñu 2024 no hetan apoiu husi Prezidénsia Repúblika, parte relijiozu, entidade pesoál, kompañia nasional no mídia na’in balun.

Jornalista: Cidalia Fátima

Editór: Evaristo Soares Martins

iklan
iklan

Leave a Reply

iklan
error: Content is protected !!