iklan

NASIONÁL, DILI, HEADLINE, POLÍTIKA

CNJTL realiza semináriu nasionál indika temátika lima ba juventude

CNJTL realiza semináriu nasionál indika temátika lima ba juventude

Prezidente CNJTL, Maria Dadi Soares Magno. Imajen Tatoli/Egas Cristovão.

DILI, 14 juñu 2024 (TATOLI) – Konsellu Nasionál Juventude Timor-Leste (CNJTL-sigla portugés) realiza semináriu durante loron ida iha Salaun Lalini Larigutu Komisaun Nasionál Eleisaun (CNE-sigla portugés) Dili hodi indika tematika lima ne’ebé importante ba joven sira iha Timor-Leste.

“Semináriu ida ne’e fó espasu ba ministériu relevante ne’ebé mak liga ho polítika nasionál juventude ne’ebé indika temátika lima ne’ebé liga ho juventude ho edukasaun, juventude ho moris saudavél, juventude empregu, juventude partisipasaun sivika no juventude liga ba prevensaun konflitu,” Prezidente CNJTL Maria Dadi Magno hateten durante semináriu ne’e.

Tuir nia, semináriu ne’e hanesan espasu pozitivu hodi akomula ministériu relevante sira hanesan, Ministériu Juventude Desportu Arte no Kultura (MJDAK), Ministériu Interiór (MI), Ministériu Saúde (MS), Ministériu Edukasaun (ME), Sekretáriu Estadu Kooperativa (SEKoop), Sekretáriu Estadu Formasaun Profisionál no Empregu (SEFOPE) atu aprezenta sira nia planu asaun anuál ne’ebé liga direta ba juventude sira.

“Tanba ita hatene katak problema juventude agora sai hanesan problema komplexu, entaun responsabilidade totál la’ós de’it MJDAK, maibé konsidera mós ho ministériu relevante seluk mós iha responsabilidade oinsá liga ho sira nia programa ne’ebé dezenvolve juventude sira nia kapasidede nune’e bele hamenus problema juventude sira nian,” nia tenik.

Alende ne’e, CNJTL mós iha papél importante halo fiskalizasaun hodi buka solusaun atu rezolve problema juventude nian, liuhusi bolu ministeriu relevante sira atu tau hanoin hamutuk tanba Estadu iha responsabilidade másimu atu rezolve problema juventude sira hasoru hanesan, dez-empregu, konflitu no seluk tan.

Iha okaziaun ne’e, Ministru Juventude Desportu, Juventude no Arte Kultura (MJDAK),  Nelyo Isaac Sarmento, ne’ebé partisipa iha semináriu ne’e hatete, Governu nafatin fó apoiu ba joven sira hodi buka meiu hotu rezolve problema ne’ebé joven sira dadaun hasoru.

Ministru Juventude Desportu no Arte Kultura (MJDAK), Nélio Isaac Sarmento. Imajen Tatoli/Egas Cristovão

“Ita iha ona planu asaun anuál hodi implementa polítika nasionál juventude. Tanba ne’e mak ita hasoru malu ho parseiru lubuk ida, ita la’ós husu sira atu apoiu maibé ita aprezenta ita nia planu asaun anuál ba sira mak haree rasik, saida mak sira bele apoiu bele apoiu oinsa dezenvolve ita nia joven sira,” Ministru ne’e dehan.

Nia dehan, Governu esforsu maka’as hela koopera ho parte hotu atu identifika problema ne’ebé dadaun ne’e joven sira hasoru no Governu iha polítika ne’ebé adekuadu atu rezolve problema ne’ebé joven sira hasoru.

“Ita hakarak ba oin mak ne’e, problema saida de’it mak jove sira hasoru dalan úniku mak tenke tur halo dialogu, labele utiliza grupu atu asalta malu ne’e la di’ak. Ha’u husu ba CNJTL atu sai orgaun ida ambrella ba joven sira halo, halo fiskalizasaun ba implementasaun polítika sira hotu iha kada ministeriu ne’ebé fó benefisiu ba joven sira,” nia hateten.

Membru governu ne’e esplika, governu foin hakotu dekretu governu kona-ba Konsellu Nasionál Dezenvolvimentu Juventude ne’e, Primeiru Ministru rasik mak lidera no agora atribui mai iha MJDAK.

“Konsellu ne’e mai husi diretór jerál kada linas ministeriais ne’ebé iha papél atu ajuda dezenvolvimentu juventude nian inklui CNJTL no mós organizasaun difisiénsia sira, Ministériu foin konklui iha semana rua ba kotuk no agora dadaun tama ba iha elaborasaun orsamentu jerál estadu 2025 espera katak Konsellu Nasionál Dezenvolvimentu Juventude no diretór  jerál  sira halo diskusaun ba area ne’ebé mak presiza investe hodi ajuda joven sira atu hadi’a nasaun. Hakarak fó de’it mensajen espesiál ba iha Konsellu Nasionál Dezenvolvimentu Juventude dialogu sira hanesan ne’e tenke sai alvu no mós programa iha ministériu relevante ,” Nelyo dehan.

Nu’udar umbrella ba organizasaun juventude sira, Ministru Nelyo hateten, konsellu nasionál tenki proativu atu fo hanoin ba ema hotu kona-ba politíka nasionál juventude, tanba estadu elabora politíka juventude ne’e hahú kedas iha Kuatru Governu Konstitusionál iha tinan 2009 no konklui iha tinan 2010, enkuantu Kintu Governu Konstitusionál halo monitoriza ba implementasaun poitíka juventude ne’e.

Ba tinan ida ne’e CNJTL hetan apoiu orsamentu husi MJDAK hamutuk $80.000, no Gabinete Apoiu Sosiedade Sivíl (GASS) hamutuk $25.000.

Orsamentu ne’ebé CNJTL hetan sei finansia ba atividade hotu ne’ebé CNJTL iha tuir planu estratéjiku ne’ebé konsagra ona iha CNJTL nia planu asaun anuál.

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!