iklan

HEADLINE, MANUFAHI

Komunidade Dotic entrega rai etare tolu ba MOP sai kampaun ba IGEADI

Komunidade Dotic entrega rai etare tolu ba MOP sai kampaun ba IGEADI

Ministru Obras Públikas, Samuel Marçal. Imajen Tatoli/Francisco Sony

MANUFAHI, 14 juñu 2024 (TATOLI) – Komunidade Suku Dotic, Postu Administrativu Alas, Munisípiu Manufahi entrega rai etare tolu ba ba Institutu Jestaun Ekipamentu Apoia Dezenvolvimentu Infraestrutura (IGEADI, sigla portuges) hodi utiliza sai hanesan kampaun ho naran Rosa Muki Bonaparte hodi responde ba situasaun emerjénsia ne’ebé akontese iha komunidade Manufahi, Ainaro, Manatutu no Viqueque.

Xefe Suku Dotic, Adelino da Costa, hateten Komunidade Dotic deside ho voluntáriu entrega rai etare tolu ba IGEADI atu sai hanesan kampaun IGEADI, lori ekipamentu pezadu IGEADI nian hodi responde ba kestaun emerjénsia sira ne’ebé Manufahi, Ainaro, Manatutu no Viqueque.

“Ohin komunidade hosi Suku Dotic entrega rai etare tolu ba IGEADI hodi sai hanesan kampaun ba IGEADI ho naran Brigada Rosa Muki Bonaparte atu IGEADI bele tau sira ekipamentu pezadu atu nune’e bele halo intervensaun lalais ba situasaun emerjénsia sira akontese iha Same, Ainaro, Manatutu, sira bele responde no ita labele hein tán”, Adelino da Costa iha nia intervensaun durante serimónia asina akordu hodi entrega rai etare tolu ba IGEADI iha Suku Dotic, Postu Administrativu Alas, Munisípiu.Manufahi, sesta ne’e.

Nia dehan, kampaun IGEADI presiza estabelese iha Manufahi atu bele halo intervensaun lalais hodi normaliza estrada, ponte no estrada ne’ebé estraga iha Manufahi, Ainaro, Manaututu inklui iha Viqueque.

“Ita hatene iha Dotic mota rua mak sai ameasa, Mota Laclo no Cleren iha Manufahi, tanba ne’e  IGEADI nia prezensa iha ne’e importante kuandu mosu dezastre ruma hanesan estrada no ponte estragu bele IGEADI bele tún hodi intervene lalais nune’e bele halo normalizasaun lalais”, nia adianta.

Nia dehan, hanesan autoridade lokál Dotic sei hamutuk ho komunidade Dotic atu tau matan ba ekipamentu IGEADI ne’ebé rai iha rai iha Dotic.

Iha fatin hanesan, Prezidente Autoridade Munisípiu Manufahi, Luis Marcal da Costa, hateten Suku Dotic hahú hatudu ezemplu ba munisípiu sira seluk katak dezenvolvimentu ne’e hahú hosi ita no ita iha obrigasaun atu kontribui mak dezenvolve foin lao.

“Ho atribuisaun rai ba IGEADI ha’u louva no agradese ba komunidade Dotic, ita bo’ot sira hatudu ezemplu d’iak ba ita hotu katak dezenvolvimentu ne’e laos ema ida nia responaablidade maibe ita hotu nia responblidade”, nia afirma.

Iha fatin henesan, Prezidente IGEADI Ana Paula, dehan atribuisaun rai hosi Komunidade Suku Doti ne’e nudar ezemplu di’ak ba komunidade munisípiu sira seluk tanba Manufahi konsidente katak povu presiza kolabora ho Estadu atu dezenvolve Timor-Leste .

“Buat ne’ebé Komunidade Suku Dotic halo ne’e nudar ezemplu di’ak ba munisípiu sira seluk, ida-ne’e hatudu katak sira hakarak kontribui ba dezenvolvimentu”, nia salienta.

Ministru Obras Publika, Samuel Marcal, mós apresia ba komunidade Suku Dotic nian inisiativa hodi oferese rai etare tolu.

“Ita bo’ot sira sai ezemplu ba munisípiu sira seluk, Manufahi oan sira tenke mantein nafatin ida- ne’e katak dezenvolvimentu ne’e laos iha ema ida ka rua nian kontribuisaun. Maibé dezenvolvimentu ne’e presiza hosi komunidade sira ema hotu nia kontribuisaun, ida-ne’e mak foin nasaun dezenvolve ho di’ak”, governante ne’e afirma.

Iha biban ne’e, nia husu ba IGEADI atu labele hein de’it udan tún mak ba halo mormalizasaun ba estrada ponte no mota sira.

“Maibé IGEADI mós buka identifika estrada, ponte no mota sira ne’ebe presiza normaliza tenke halo ona intervensaun atu nune’e bele fasilita komunidade bele lao ba mai”, nia konklui.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!