iklan

HEADLINE, MANUFAHI

MOP tau fatuk dahuluk ba reablitasaun estrada Wedaberec ba Alas

MOP tau fatuk dahuluk ba reablitasaun estrada Wedaberec ba Alas

Ministru Obra Públika, Samuel Marçal. Imajen Tatoli/António Daciparu

MANUFAHI, 14 junu 2024 (TATOLI) – Ministru Obras Públika, Samuel Marcal, akompaña hosi Vise-Ministru Asuntu Parlamentár Aderito Hugo, Sekretáriu Estadu asuntu Topónomia Organizasaun Urbanizasaun (SEATOU), Germano Santa Brites no Embaixadora Xina iha Timor-Leste Wang Wenli hatur fatuk dahuluk ba projetu reabilitasaun estrada hosi Suku Wedaberec, Aldeia Meti-Oan ba to’o Postu Administrativu Alas ho kilometru 23.

Projetu reabilitasaun estrada Wedaberec ba Postu Administrativu Alas responsabiliza hosi empreza internasionál Xina ho naran China Nuclear Industry 22nd Construction Co, Ltd.

Atividade hatur fatuk dahuluk hahú ho serimónia kulturál, oho karau hodi hikis nia ran ba fatin projetu nian nudar jestu atu empreza bele halo projetu ho di’ak.

Ministru Samuel, dehan hatur fatuk dahuluk ida-ne’e realiza tanba Governu asina ona ho empreza internasionál semana kotuk.

“Projetu reabilitasaun Estrada Wedaberec ba Postu Alas ne’e, ha’u asina ona kontratu ho empreza intenasionál China Nuclear Industry iha semana kotuk no ohin ita mai ne’e atu hatur fatuk dahuluk para bele fó biban ba empreza atu hahú halo Obra ne’e”, Samuel Marcal iha nia intervensaun serimónia hatur fatuk dahuluk ba projetu estrada Wedaberec ba  Postu Administrativu Alas ne’ebé halo iha Alas, Munisípiu Manufahi, sesta ne’e.

Governante ne’e hateten, projetu reabilitasaun estrada Wedaberec ba Postu Alas ne’e halo ho orsamentu millaun $13.8.

Iha fatin hanesan, Vise Ministru asuntu Parlamentár, Aderito Hugo, hateten reabilitasaun estrada ida-ne’eh importante tanba bele halo konetividade entre movimentu komunidade Wedaberec ba Postu Alas.

Nia lebra, uluk Postu Alas ne’e koñesidu katak Postu Alas de Cima no Alas de baixo no uluk komunidade iha fatin ne’e labele lao ba mai to’o kapitál munisípiu tanba kondisaun estrada.

“Maibé ho reabilitasaun estrada ida-ne’e halo Postu Alas sai ida de’it no ida-ne’e bele ajuda hodi fasilita komunidade halo atividade ekonómiku, tanba komunidade iha Alas ne’e barak produsaun kafé, hakiak animál no produtu ai-fuan sira seluk. Ho ida-ne’e komunidade sira bele lori sira produtu mai Munisípiu Manufahi no ba fatin seluk”, governante ne’e afirma.

Aderito Hugo husu ba MOP hodi alo levantamentu iha Munisípiu Manufahi estrada hira mak kondisaun grave no komunidade labele asesu atu Govenu bele konsidera hodi halo reabilitasaun atu ajuda komunidade atu halo sira-nia atividade ekonómiku, ida-ne’e mak povu hakarak.

Prezidente Autoridade Munisípiu Manufahi, Luis Marcal da Costa Tavares, hateten ba reabilitasaun estrada importante tanba bele ajuda komunidade Wdaberec ba Alas no hosi Postu Alas bele mai Wedaberec.

“Projetu reabilitasaun ida-ne’e importante, tanba marka iha istória povu Alas primeiru vez, tanba  sira foin iha estrada hafoin Timor-Leste ukun aan, agradese ba Governu sentrál hadia ami-nia estrada”, katak nia

Nune’e mos Administradór Postu Alas, Aquelino da Costa Coelho, agradese ba Governu Sentrál tanba bele hadia ona estrada Postu Alas ba Wedaberec.

“Ida-ne’e hanesan grasa ida tanba estrada iha fatin ida-ne’e tinan barak ona aat maibé Governu Konstitusional ohin hatur ona fatuk dahuluk ba reblitasaun, ita tenke agradese no husu atu koopera”, nia dehan.

Embaixadora Xina iha Timor-Leste, Wang Wenli, hateten empreza China Nuclear Industry 22nd Construction Co, Ltdta nudar empreza bo’ot iha Xina ne’ebé kaer projetu barak ho kualidade iha Xina.

“Xina kontinua apoia dezenvolvimentu Timor-Leste iha kulker aspetu tanba relasaun Xina ho Timor-Leste lao kleur ona no lao di’ak tebes”,diplomata ne’e afirma.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!