iklan

HEADLINE, POLÍTIKA

Ezisténsia ba da-23, PD konta ho jerasaun foun nian kontribuisaun ba dezenvolvimentu

Ezisténsia ba da-23, PD konta ho jerasaun foun nian kontribuisaun ba dezenvolvimentu

DILI, 15 Juñu 2024 (TATOLI) – Partidu Demokrátiku (PD) selebra nia aniversáriu ba da-23 ho tema “Tane Ukun Rasik-Aan, Hatutan Erói Sira-Nia Mehi”. Iha ámbitu serimónia ne’e Prezidente partidu, Mariano Assanami Sabino, dehan PD konta ho jerasaun foun iha Timor-Leste hodi kontribui ba dezenvolvimentu nasionál.

Assanami dehan Partidu Demokrátiku sura ho jerasaun foun sira ne’ebé daudaun hela iha rai-laran no li’ur hodi hatutan mehi luta-na’in sira-nian.

“Ba Estudante, joven, kosok-oan sira mak na’in ba Partidu Demokrátiku. Partidu Demokrátiku la’ós fundadór de’it, maibé jerasaun hotu-hotu”, Assanami hato’o iha nia diskursu iha serimónia selebrasaun ne’e, iha sede PD, iha Colmera, Dili.

Prezidente ne’e garante katak “uma azul sei simu ema barak no ema barak sei mai atu la’o ba oin. PD iha nia misaun no vizaun klara, iha istória klara husi rezisténsia hodi harii partidu atu kontinua papél lutadór sira-nian”.

Dirijente PD ne’e salienta katak partidu foka liu ba demokrasia katak tenke iha instituisaun Estadu hotu atu povu bele sente no partisipa iha prosesu dezenvolvimentu nasionál no povu mak tenke hetan benefísiu no PD hakarak demokratiza setór hotu-hotu.

“PD sura ema hotu nia kontribuisaun ba iha partidu, hakerek no konta iha istoria partidu nian. Ami lahaluha, ami sempre sura no hakerek iha istória Partiku Demokrátiku. Ba sira ne’ebé lakon inan-aman, oan-ki’ak, knua ne’e nafatin imi-nian hodi aprende sai lideransa”, nia afirma.

Iha fatin hanesan, Padre Joel Casimiro Pinto kongratula mós Partidu Demokrátiku hanesan partidu joven, tanba tinan 23 eziste hodi kontribui ba iha konstrusaun Estadu.

“Hanesan ema karik konklui ona estudu iha universidade hodi hala’o moris reál ka serbisu. Husi selebrasaun tinan 23 ne’e, ita bele hateten katak oinsá fó sentidu iha perkursu hanesan grasa no bensa husi Maromak rasik. Tinan 23 ne’e idade produtiva ona, PD atu prodús buat barak, la’ós hanesan labarik joven oan ida hodi buka tuir sé loos, modelu oinsá, sé mak ha’u-nia figura famozu, ida ne’e akaba ona”, Padre Joel Casimiro Pinto dehan iha momentu halo reflesaun iha anivesáriu partidu nian.

Saserdote ne’e halo komparasaun karik idade 23 hanesan ema termina ona estudu universidade nian, atu implementa nia pensamentu analojia. Tempu atu implementa estudu sira ne’e, peskiza kle’an tiha ona no tama ona ba iha postu traballu atu kompete ho ema seluk.

Tenente Jenerál Reformadu, Lere Anan Timur.

Iha sorin seluk, Tenente Jenerál Reformadu Falintil-Forsa Defeza Timor-Leste, Lere Anan Timur, hateten PD harii husi jerasaun kompatriota no intelektuál sira.

“Imi eroi ba revolusaun ukun rasik-aan. Sai eroi ba ema barak ne’ebé balun lahamutuk ona ho ita tanba fó sira aan atu hetan ita-nia soberania no independénsia Timor-Leste. Ohin loron imi sai eroi foun”, Lere Anan Timur dehan.

Tanba ne’e, nia husu ba PD atu kaer prinsípiu ida interese povu no nasaun nian, tanba ema barak sei halerik. “Ha’u fiar PD ukun ho fuan no responsabilidade. Ita sei iha krize ekonómika no setó saúde”, nia lamenta.

Nia reforsa katak Governu tenke tau-matan ba iha setór edukasaun no saúde, tanba ida ne’e sai área fundamentál ba nasaun.

Jornalista: Jesuína Xavier

Editor: Maria Auxiliadora

iklan
iklan

Leave a Reply

iklan
error: Content is protected !!