DILI, 17 juñu 2024 (TATOLI) – Ministru Komérsiu no Indústria, Filipus Nino Pereira, hateten Governu nafatin promove grupu joven sira ne’ebé iha abilidade ba indústria sira iha Timor-Leste.
“Ami nafatin promove grupu joven sira ne’ebé mak iha abilidade ba indústria kiik sira, liuliu atividade resiklajen sira ne’ebé mak sira halo ona no sai valór ekonómiku iha ita-nia rain”, Filipus Nino Pereira, informa ba jornalista sira iha Farol, ohin.
Nia dehan, atu ko’alia kona-ba ambiente mak oinsá bele transforma fali produtu hanesan aqua mamuk sai fali produtu ne’ebé iha valór ekonómiku, entaun joven sira-nia produsaun presiza nafatin apoiu no dudu nafatin atividade sira hodi ba oin.
“Ita mós selebra hela loron mundiál ba oceanu nian, entaun ita mós iha atividade lubuk ida liga ho ita-nia ambiente moos, ida mak oinsá bele transforma fali produtu hanesan aqua mamuk sai fali produtu ne’ebé iha valór ekonómiku, entaun ha’u hanoin saida mak joven sira halo ne’e presiza nafatin suporta no dudu nafatin atividade sira ne’e la’o ba oin, la’os de’it transforma produtu sira ne’e ba produtu ekonómiku maibé oinsá bele kontribui mós redús lixu”, nia relata.
Iha fatin hanesan, Koordenadór Rede Hasatil, Gil Horacio Boavida, dehan inisiativa ba resiklajen ne’e tanba haree ba kondisaun realidade Timor-Leste ne’ebé liga ho problema lixu sai ameasa boot ba ambiente.
“Ita haree lixu fó impkatu tebes ba ita-nia ambiente, entaun ami halo koperasaun ho parseiru UNDP hodi apoiu fasilidade ida-ne’e no ikus ita halo atividade resiklajen, entaun ita-nia grupu ne’e balun iha Caicoli no balun iha Tasi-Tolu hodi transforma lixu ne’e ba kreativu sira seluk”, Gil Horacio Boavida dehan.
Nia afirma, atividade resiklajen hahú dezde 2021, maibé ida-ne’e seidauk másimu tanba mákina ne’ebé mak iha seidauk sufisiente, entaun oinsá Governu bele apoiu atu bele tarsforma indústria produsaun resiklajen bele hamosu produtu sira ne’ebé mak iha valór no folin iha merkadu.
“Ohin ita boot sira haree rekursu no ekipamentu seidauk másimu, tanba ne’e mak ami konvida Ministru Komérsiu Indústria hodi haree oinsá ita bele halo kooperasaun atu ita bele transforma ba indústria transformasaun resiklajen hodi hamosu produtu sira ne’ebé mak iha valór no folin iha merkadu sira no ida seluk mak ita mós fó servisu ba ita-nia joven sira ne’ebé iha abilidade ba indústria sira ne’e”, nia afirma.
Tanba ne’e, nia husu ba Governu atu apoiu produsaun resiklajen ne’ebé inisiativa hosi joven sira barak mak iha koñesimentu di’ak, atu bele kapasita no sira bele transforma atividade jestaun lixu resiklajen sai ba indústria sira.
“Ha’u husu ba Governu apoiu produsaun resiklajen sira ne’e liuliu hasae koñesimentu joven sira nian atu nune’e sira bele transforma lixu ba resiklajen indústria sira tanba produsaun ida-ne’e ba ai-funan sira no mós lixu orgániku sai ba adubu no seluk ne’ebé mak ita-nia joven sira halo iha ne’e”, nia konklui.
Jornalista : Felicidade Ximenes
Editór : Zezito Silva
