DILI, 17 juñu 2024 (TATOLI)–Musulmanu Timor-Leste liuliu komunidade musulmanu iha Meskita Annur, Kampung Alor, Dili, selebra loron Idul Adha 1445 H no loron sakrifisiu ne’e ho orasaun no asaun karitativa hodi fahe domin ba ema kbiit laek sira.
Xefe Fundasaun Annur, Anwar da Costa, hateten benefisiáriu ba asaun karitativa ida-ne’e liuliu komunidade musulmanu iha ema besik 1.000.
“Komunidade musulmanu iha Meskita Annur Kampung Alor oho karau 17 no bibi 13 hodi selebra loron Idul Adha ne’e, no fahe ba komunidade kibit laek sira musulmanu nian,” Xefe Fundasaun Annur ne’e hateten ba Agência Tatoli, iha Meskita Annur Kampung Alor, segunda ne’e.
Tuir nia, komunidade musulmanu iha munisipiu sira mós halo asaun karidade no misa sholat hamutuk hodi halo selebrasaun loron boot ne’e.
Nia dehan, komunidade musulmanu selebra loron Idul Adha ne’e hahú orasaun iha tuku 07h00 dadeer no kontinua oho animál sira-ne’e hanesan bibi no karau hodi bele fahe ba ema kbiit laek sira.
“Iha atividade rua, primeiru ami reza misa jerál hamutuk komunidade iha Díli laran mais sholat hamutuk, depoizde ida-ne’e Komisaun organizadora organiza oho animál hanesan bibi no karau,” nia dehan.
Iha fatin hanesan, Malik Leo, sente kontente selebra loron Idul Adha hodi hasa’e loron sakrifisiu ba Maromak, liuliu ema sira-ne’ebé iha kapasidade bele kontribui sakrifisiu ba loron ne’e hodi fahe ba ema kbiit laek sira.
Selebrasaun ne’e atu hanoin hikas fali profeta Abrão nia mehi ho Maromak atu sakrifika nia oan Ismael, tanba ne’e hodi hanoin hikas sakrifisiu ne’e.
“Loron Idul Adha hanesan loron sakrifisiu Ismael nian, ami kontente selebra no simu loron ida ne’e,” Malik Leo hateten.
Nia hateten, ami halo ona orasaun ka sholat ba loron Idul Adha nian no oho animál ba sakrifisiu hodi bele fahe ba ema kbit laek sira.
Jornalista : Jesuína Xavier
Editór : Cancio Ximenes
