DILI, 17 juñu 2024 (TATOLI)- Prezidente Repúblika, José Ramos Horta, hato’o votu kmanek ba komunidade Musulmanu iha Timor-Leste no mundu ne’ebé, Segunda ne’e, selebra loron Idul Adha 1445 H.
“Maun-alin no Inan-feton Musulmanu sira iha Timor-Leste, hodi povu Timor-Leste nia naran, ha’u hato’o ha’u-nia votus kmanek liu ba imi hotu iha okaziaun Ksolok Idul Adha 2024,” Xefe Estadu hato’o liuhusi nota ne’ebé Agência TATOLI asesu.
Xefe Estadu afirma: “Idul Adha fó-hanoin mai ita kona-ba lisaun kle’an sira ne’ebé ita aprende husi istória dispozisaun profeta Ibrahim hodi sakrifika nia oan-mane obediénsia ba ordem Maromak nian. Tempu atu refleta kona-ba valór sira husi ita-nia an rasik, devosaun, no Forsa husi ita-nia konviksaun”.
Iha loron ne’e, PR Horta afirma: “ha’u hakarak rekoñese kontribuisaun ne’ebé boot husi Maun-alin no Inan-Feton Musulmanu sira-nian ba ita-nia sosiedade Timor-Leste. Imi-nia komitmentu ba fiar, família, no komunidade sira-ne’e hala’o ona papél importante ida hodi forma ita-nia nasaun nia identidade no haburas espíritu unidade no komprensaun,” katak.
Ho ita selebra okaziaun Ksolok ida ne’e, mai ita hatutan fali ita-nia komitmentu ba relijiaun nia armonia no respeitu malu. Iha Timor-Leste, ita orgullu tebes ho ita-nia diversidade no ko-ezisténsia pasifika husi fiar oioin.
“Ha’u hein katak Idul Adha ida-ne’e bele hametin liután relasaun irmaun-irman sira-nian iha sidadaun hotu-hotu nia leet, la haree ba sira-nia fiar relijioza”.
Durante selebrasaun ida-ne’e, mai ita hanoin-hetan mós maluk sira ne’ebé iha susar nia laran no fó apoiu no laran-sadi’a ba sira. Idul Adha nia esensiál loos mak fahe ita-nia bénsaun no lori ksolok ba ema seluk nia moris.
“Dala ida tan, ha’u hato’o ha’u-nia votus Kmanek ba imi hotu ne’ebé selebra Idul Adha ho haksolok, dame, no prosperidade. Hein katak Idul Adha nia espíritu sei lori ksolok, unidade no kumprimentu espirituál ba Musulmanu sira iha Timor-Leste no mundu tomak”.
TATOLI
