DILI, 18 juñu 2024 (TATOLI)—Prezidente Sentru Lojístika Nasionál (CLN, sigla portugés), Antonio de Araujo Soares, informa, CLN halo ona intervensaun merkadu ho foos 150 tonelada ba iha Munisípiu Ermera, Dili no Rejiaun Administrativa Espesiál Oe-Cusse Ambeno (RAEOA).
“Durante ne’e ita halo ona intervensaun merkadu ho foos 150 tobelada ba iha Munisípiu tolu hanesan Dili-Ataúro foos 50 tonelada, depois Ermera 50 tonelada no RAEOA 50 tonelada. Agora se mak atu hetan foos ne’e Autoridade Lokál sira mak identifika ema vuneravel sira, entaun ida-ne’e mak sira tau prioridade, tanba ita iha nasionál ita la hatene se loos mak iha karik vuneravel loos, entaun Autoridade sira identifika depois sira rasik halo lista ida no to’o iha ne’ebá prioridade ba sira ne’ebé mak identifikadu ne’e,” Antonio de Araujo Soares informa ba TATOLI via telefonika, ohin.
Autoridade másima CLN ne’e relata, foos intervensaun ne’ebé mak Governu halo ne’e kuantidade mínimu ba povu sira ne’ebé mak la iha kbiit atu sosa foos ho folin $19 to’o $22.
“Ita mós lori foos kuantidade la barak no ita labele responde hotu, entaun uitoan ka barak ita presiza duni halo intervensaun ba ita-nia povu,” nia akresenta.
Prezidente Antonio de Araujo esplika, daudaun ne’e Governu prepara aan atu halo tan intervensaun ba iha Munisípiu Lautem no mós Baucau nune’e mós ba munisípiu sira seluk ne’ebe mak iha.
“Ita halo intervensaun merkadu ne’e la’ós ema hotu hotu hetan, maibé ba ema vuneravel sira, maibé planu katak tinan oin ita halo intervensaun tinan tomak nune’e foos sira iha merkadu folin bele mudansa uituan, tanba ne’e ita labele iha situasaun difisil ona mak ita mosu halo intervensaun,”nia afirma.
Ezekutivu ne’e haktuir, daudaun ne’e foos folin karun tanba folin iha merkadu globál mós aas, nune’e nasaun India; produtor, foos taka ona entaun husi buat sira ne’e situasaun mosu oin seluk.
“Ita halo intervensaun ne’e sei kobre hotu iha territóriu nasionál maibé daudaun ne’e ita-nia foos iha armazen sei sufisiente nune’e bele kobre hotu,” nia konklui.
Jornalista : Felicidade Ximenes
Editór: Rafael Ximenes de A. Belo
