iklan

HEADLINE, INKLUZAUN SOSIÁL

CNR atribui ona kadeira roda 100-resin ba ema defisiénsia

CNR atribui ona kadeira roda 100-resin ba ema defisiénsia

Diretór Jerál Sentru Nasionál Reabilitasaun Becora, Alexandre Morais. Imajen/Tatoli

DILI, 18 juñu 2024 (TATOLI)—Ministériu Solidaridade Sosiál no Inkluzasaun (MSSI) liuhusi Sentru Nasionál Reabilitasaun (CNR, sigla portugés) Becora atribui ekipamentu mobiliáriu hanesan kadeira roda hamutuk 100-resin ba ema ho defisiénsia no idozu, iha trimestre dahuluk tinan ne’e.

“Iha tinan kotuk ita apoiu kadeira roda hamutuk 500-resin,” Diretór Jerál CNR, Alexandre Morais, informa ba Agência Tatoli, iha MSSI, Caicoli, tersa ne’e.

CNR iha tinan 2024 hetan alokasaun orsamentu millaun $1,4, ne’ebé aloka mós orsamentu $250.000 hodi sosa kadeira roda sira inklui ekipamentu seluk.

“Ita fó apoiu bazeia ba pedidu sira ne’ebé maihusi munisípiu sira maibé ita-nia difikuldade mak laiha transporte atu perkore hotu munisípiu sira to’o área rurál hodi apoiu ba ita-nia maluk sira-ne’ebé presiza,” nia akresenta.

Notísia relevante : MTK taka stiker ba transporte públiku kona-ba direitu ema ho defisiénsia

CNR daudaun iha transporte neen, ne’ebé kondisaun ne’e difísil responde hotu ba pedidu sira.

“Ita mós iha atividade ho naran Serbisu Reabilitasaun Integradu ba Komunidade iha Área Rurál , entaun ekipa sira tun direitamente hodi halo esplikasaun ba maluk ho defisiénsia sira ne’ebé mak presiza tulun husi CNR hanesan ain falsu, kadeira roda, ai-tonka, no seluk tan. Ita hatene foti dadus no fó apoiu. Difikuldade hotu ne’ebé ami mós planu ona nune’e tinan tenke aumenta viatura nune’e bele reforsa ita-nia serbisu sira to’o área rurál sira ne’e,” nia Diretór Jerál tenik.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!