iklan

EDUKASAUN

Estudante DKS-UNTL apoia komunidade reabilita Kapela Avé Maria Aituto

Estudante DKS-UNTL apoia komunidade reabilita Kapela Avé Maria Aituto

DILI, 18 juñu 2024 (TATOLI) –Estudante Departamentu Komunikasaun Sosiál (DKS) husi Fakuldade Siénsia Sosiál (FCS, sigla portugés), Universidade Nasionál Timor Lorosa’e (UNTL) apoia komunidade liuhusi serbisu fíziku – lalin fatuk, ajuda badaen sira, no apoia sumente saka 15, hodi reabilita kapela Avé Maria Aituto nian.

Atividade apoiu ne’e nu’udar parte ida husi atividade ‘Bina-akrab’ atu hametin amizade entre estudante ho Dosente no komunidade no sarani sira iha suku Aituto, durante loron tolu (13-16 juñu).

“Atividade ida-ne’e inisiativa mai husi estudante, dosente no alumni sira hodi hili suku Aituto Flecha sai hanesan fatin hodi halo atividade bina-akrab no atividade ne’ebé maka ami halo hanesan ajuda komunidade sira,” refere komunikadu husi UNTL ba Agência TATOLI, ohin.

Estudante sira mós halo sensibilizasaun iha Ensinu Sekundária Jerál Fernando Lasama Aituto, iha mós noite-kultura (amisaun múzika, dansa-tradisionál, poezia, no loke filme DCS nian) ba komunidade inklui autoridade lokál suku Aituto nian. “Aleinde ne’e halo limpeza jeral iha fatin ne’ebé ami iha ba hanesan aredór suku no kapela nian,” komunikadu ne’e sita.

Iha fatin hanesan, estudante Esquiel da Costa Pinto, kontenti ho atividade Bina-akrab ne’e, tanba bele koñese malu di’ak liután entre estudante, dosente, alumni no komunidade sira.

“Ha’u hanesan estudante foun tinan akadémiku 2024 nian sente orgullu ho atividade ida-ne’ebé organiza husi Departamentu Komunikasaun Sosiál sira. Tanba liuhusi atividade ida-ne’e ami bele kria amizade no apriende hamutuk ho sira liuliu ajuda Komunidade sira no halo mós atividade seluk,” estudante ne’e dehan.

Nune’e mós Xefe suku Aituto, Grigorio Lopes Pereira agradese ba DCS, tanba bele hili Aituto hanesan lokál ba atividade oioin ne’ebé bele ajuda komunidade no sarani sira iha Aituto.

“Lori komunidade Aituto agradese ba DCS liuliu estudante, dosente, alumni sira tanba bele mai iha Aituto ne’e ho atividade oioin ne’ebé bele ajuda komunidade, ne’e hatudu ona estudante sira mak sai ajente transformadór ba dezenvolvimentu,” Finalista husi DCS-FCS ne’e akresenta.

Dosente responsável ba atividade servisu sosiál iha DCS, Miguel Gonçalves hateten, atividade ne’ebé departamentu la’ós kria de’it amizade entre estudante foun, estudante tuan, dosente, no alumni sira maibé hakbesik ba komunidade hodi halo mós atividade servisu sosiál.

“Liuhusi atividade Bina-akrab ne’e ita fahe ba sesaun lubuk ida atu lori estudante sira kumpri pilár universidade nian edukasaun, peskiza no servisu sosiál, nune’e hakbesik ba besik ba serbí komunidade,” nia dehan.

Atividade realiza ho apoiu husi estudante, dosente, alumni DCS nian no kolabora ho autoridade lokál suku nian, Amu Paroku Maubisse nian inklui katekista sira husi Kapela Ave-Maria Aituto nian.

Tatoli

iklan
iklan

Leave a Reply

iklan
error: Content is protected !!